Kryetari i Partisë Demokratike të Kosovës (PDK), Memli Krasniqi, ka zhvilluar një vizitë në Hagë, ku është takuar me ish-presidentin Hashim Thaçi dhe ish-kryetarin e Kuvendit, Kadri Veseli, të cilët prej gati pesë vitesh po mbahen në paraburgim nga Dhomat e Specializuara të Kosovës.
Krasniqi e cilësoi takimin si “të ngrohtë dhe emocionues”, duke thënë se tek të dy liderët “ndjehej e gjallë bindja e palëkundur se drejtësia për çlirimtarët tanë po afrohet”.
Sipas tij, Thaçi dhe Veseli janë në gjendje të mirë shëndetësore, ruajnë moral të lartë dhe optimizëm, pavarësisht procesit gjyqësor që e konsiderojnë të tejzgjatur dhe të padrejtë.
“Liria, askund e asnjëherë, nuk është as mëkat e as faj. Ata janë mirë, optimistë dhe, si gjithmonë, dërgojnë përshëndetjet më të ngrohta për secilin prej jush,” shkroi Krasniqi.
Ai shtoi se të dy janë të informuar për zhvillimet në Kosovë, gëzohen për lajmet e mira dhe ndajnë dhimbjen me popullin në momentet e vështira.
“Mbi të gjitha, besojnë fuqimisht në një të ardhme më të ndritur për vendin tonë, një të ardhme që ndërtohet me punë, vizion dhe vullnet të pathyeshëm,” deklaroi kryetari i PDK-së.
Krasniqi e përmbylli njoftimin e tij me fjalët e Hashim Thaçit: “Dielli do të lind përsëri!”
