Kryetari i Partisë Demokratike të Kosovës, Memli Krasniqi, ka reaguar pas vendimit të Gjykatës Kushtetuese duke e cilësuar atë si vulë mbi të vërtetën që PDK e ka thënë për muaj me radhë.
Në një postim në Facebook, Krasniqi tha se Lëvizja Vetëvendosje ka mbajtur peng Kuvendin, duke e bllokuar funksionalizimin e tij për interesa të ngushta politike dhe në kundërshtim me Kushtetutën.
“Me Aktgjykimin e 7 gushtit, Gjykata shpalli të pavlefshme të gjitha veprimet parlamentare arbitrare nga 27 qershori deri më 26 korrik; konstatoi se deputetët nuk kanë zbatuar vendimin kushtetues të 26 qershorit; se veprimet e Kryesuesit të seancës ishin antikushtetuese; dhe se Komisioni për Votim të Fshehtë ishte i jashtëligjshëm”, shkroi ai.
Sipas Krasniqit, për gjashtë muaj qytetarëve iu mohua përfaqësimi, institucioneve iu ndal funksioni dhe vendi u fut në një krizë të qëllimshme e të rrezikshme për demokracinë.
Ai theksoi se PDK ka zgjedhur rrugën e ligjshmërisë dhe besimit në Kushtetutë, duke iu drejtuar Gjykatës Kushtetuese për ta zgjidhur ngërçin institucional.
“Kosova nuk mund të ecë përpara me institucione të paralizuara dhe me rregulla të shkelura sipas tekave të pushtetit. Ata që zgjodhën krizën, dështuan. Ne që zgjodhëm Kushtetutën, fituam”, përfundoi ai.
Vendimi i Gjykatës Kushtetuese thekson se kryetari i Kuvendit duhet të zgjidhet përmes votimit të hapur, me një kufi prej tri tentimeve për secilën kandidaturë, dhe se procesi konstituiv duhet të përfundojë brenda 30 ditësh.
