Kryeministrja e Italisë Giorgia Meloni deklaroi në parlamentin italian se “modeli Shqipëri”, i cili po ndiqet me interes nga shumë vende evropiane, do të funksionojë dhe do të kontribuojë në uljen e flukseve të emigracionit të parregullt.
Sipas saj, ky model shërben edhe si mjet parandalues për të luftuar trafikun e qenieve njerëzore, pavarësisht kundërshtimeve nga e majta, e çdo rangu dhe niveli.
“Modeli i bashkëpunimit mes Shqipërisë dhe Italisë, për të zgjidhur emigracionin e paligjshëm do të ketë sukses. Ky model shërben më së miri dhe si mjet parandalues për të luftuar trafikun e qenieve njerëzore, pavarësisht kundërshtive nga e majta, e çdo lloj niveli. Pavarësisht nëse e majta, e të gjitha llojeve, e pëlqen apo jo”, tha kryeministrja Giorgia Meloni në fjalimin e saj para Dhomës së Deputetëve përpara Këshillit të BE-së.
Deklarata u bë gjatë fjalimeve në parlament, në prag të mbajtjes së mbledhjes së Këshillit Evropian, ku do të diskutohet edhe situata e sigurisë dhe migracionit në rajon.
Meloni foli në parlamentin italian edhe për situatën në Ukrainë, ku theksoi se Italia nuk ka dhënë miratim për përdorimin e aseteve ruse dhe se çdo vendim kërkon një bazë të fortë ligjore.
Ajo shtoi se situata kërkon përgjegjësi të lartë politike, pasi në lojë është siguria e Evropës, dhe se vendimi final për përdorimin e mjeteve ushtarake do të merret nga liderët evropianë, pa shkaktuar pasoja për buxhetet kombëtare të vendeve anëtare./rtsh/
