Kandidati i Lëvizjes Vetëvendose për kryetar të Vushtrrisë, Sylejman Meholli ka thënë se koalicioni me Lidhjen Demokratike të Kosovës për raundin e dytë do të sjellë fitoren.
Ai ka thënë se këto dy parti sa herë që janë bërë bashkë kanë ndryshuar pushtetin duke ju referuar koalicionit të vitit 2017.
Sipas tij, këtë koalicion po e mbështesin edhe qytetarët.
“Me koalicionin e fitores bashkë me LDK por edhe me shumë figura të rëndësishme qytetare që na janë bashkuar pavarësisht bindjeve politike e që po na bashkohen çdo ditë, konsiderojmë që jemi shumë afër fitores. Sa herë që jemi bërë bashkë me LDK ne kemi fituar garën dhe kemi ndryshuar pushtetin në Vushtrri. Qytetarët janë të lumtur që ne jemi bërë bashkë dhe bashkimi jonë prodhon një rezultat që në raundin e parë prodhon mbi 50%”, ka thënë Meholli në emisionin “Këndi i Debatit” në Tëvë1.
I pyetur për kundërshtimin që i ka bërë kryetari i LDK-së koalicionit, ai ka thënë se ata kanë mbështetjen e gjithë degës të kësaj partie në Vushtrri.
“Fryma e strukturës së LDK-së, e kryetarit të degës, Xhafer Tahiri është jashtëzakonisht pozitive, jashtëzakonisht mbështetëse. Do të qeverisim bashkë për Vushtrrinë, do ta kemi ndarjen e pushtetit në mënyrë proporcionale”, ka thënë Meholli.
Të dielën në raundin e dytë për kryetar të Vushtrrisë në garë janë Ferit Idrizi i PDK-së dhe Sylejman Meholli i LVV-së.
Në raundin e parë Idrizi, mori 13,799 vota apo 45.24%, ndërsa Meholli i LVV-së 9,399 vota apo 30.81%.
