Lëvizja Vetëvendosje ka konfirmuar marrëveshjen për garim të përbashkët në zgjedhjet e ardhshme me partnerët e saj politikë, partinë GUXO, Alternativën dhe Partinë Shqiptaro-Demokristiane të Kosovës.
Lajmi u bë i ditur nga përfaqësuesi i LVV-së, Sylejman Meholli, gjatë emisionit “Ditari” në Tëvë1, ku ai foli edhe për zhvillimet politike që çuan vendin drejt zgjedhjeve të reja.
Ai ka kritikuar partitë opozitare për mosprezencën e tyre në seancën e thirrur për zgjedhjen për president të vendit.
“LVV ka arritur marrëveshje të bashkëpunimit dhe të garimit të përbashkët në koalicion me partinë GUXO, alternativa dhe me partinë Shqiptaro-demokristiane. Ne do të vazhdojmë të garojmë bashkë me këta partner në dobi të një qeverisje të mirë dhe progresiste dhe do ta ruajmë besimin qytetar që na kanë jep qytetarët e këtij vendi për me qeverisë…. Kosova nuk ka pasur nevojë për zgjedhje të reja, 28 dhjetori ishte verdikti më bindës që qytetarët e kësaj republike kanë dhënë ndonjëherë dhe njerëzit duhet ta kuptojnë edhe opozita që është kulturë politike me njoftë verdiktin e popullit. LDK-ja, PDK-ja dhe opozita në përgjithësi e dërgoi vendin në zgjedhje sepse nuk deshën zgjidhje nuk sillën emra, as nuk qëndruan në sallën e Kuvendit. Është ofendim për qytetarët e Kosovës me nejt në hollë të Kuvendit në ditën kur është thirr seanca për president e së paku me ardhë me i thënë qëndrimet e veta”, ka deklaruar Meholli në emisionin “Ditari” në Tëvë1./teve1.info/
