Publicisti Kim Mehmeti e ka kritikuar kryeministrin e Shqipërisë, Edi Rama, duke e cilësuar si “të turpshme” mënyrën se si ai, sipas tij, e ka përdorur ftesën e presidentit amerikan, Donald Trump, për pjesëmarrje në Bordin e Paqes.
Në emisionin “Këndi i Debatit” në Tëvë1, Mehmeti ka thënë se Rama jo vetëm që e ka përdorur këtë ftesë, por edhe e ka keqpërdorur atë për konsum të brendshëm politik, duke krijuar një imazh të rremë për popullin shqiptar.
“Ishte e turpshme ajo tendenca e Edi Ramës që donte të tregonte sikur vetëm ai është ftuar. Sikur mos të ishte zbuluar se ka edhe të tjerë të ftuar, ai do të vazhdonte ashtu. Reagimi i tij i parë ishte se kjo është diçka që as nuk e kam ëndërruar, ndërkohë që aty janë ftuar edhe Putini dhe presidenti bjellorus. Tendenca e administratës amerikane është që të ketë sa më shumë shtete të përfshira. Mënyra sesi Rama manipulon popullin me çdo gjë është e padurueshme”, ka deklaruar Mehmeti.
I pyetur nëse kjo ftesë mund të shihet si një goditje për opozitën, Mehmeti është shprehur se Shqipëria aktualisht nuk ka një opozitë efektive.
“Opozitë është rinia, dhe rinia e Shqipërisë është jashtë vendit. Pjesa e mbetur e rinisë nuk është aq e interesuar për Shqipërinë, sepse ndihen si banorë të përkohshëm dhe presin momentin e duhur për të dalë jashtë. Por kjo nuk do të thotë se Shqipëria nuk bëhet; ne duhet të themi që Shqipëria bëhet, shqiptaria bëhet dhe shqiptaria do të mbetet”, ka përfunduar ai.
Ndryshe, kryeministri shqiptar, Edi Rama përmes një letre drejtuar Presidentit të Shteteve të Bashkuara të Amerikës, Donald Trump, ka pranuar ftesën për të marrë pjesë në Bordin e Paqes.
Në letrën drejtuar Presidentit Trump, Rama ka shprehur vlerësimin e thellë për angazhimin dhe udhëheqjen vizionare të tij në themelimin e Bordit dhe ka falënderuar për ftesën e drejtpërdrejtë për të qenë pjesë e kësaj nisme si përkrahëse themeluese për Shqipërinë.
“Kjo është një kohë kur konfliktet dhe përçarja dominojnë shpesh panoramën ndërkombëtare, dhe paqja duhet të formësohet aktivisht, jo të pritet pasivisht. Bordi i Paqes është një nismë që trajton pasojat e menjëhershme të konflikteve dhe shkaqet strukturore të paqëndrueshmërisë, duke ofruar një model transformues për ndërtimin e paqes në nivel global,” ka shkruar Rama./teve1.info/
