Ish-hetuesi i Policisë, Murat Mehmeti, vlerëson se Policia e Kosovës ka nevojë për një reformim të plotë, veçanërisht në menaxhimin e lartë.
Në emisionin “Ditari” në Tëvë1, Mehmeti ka thënë se duhet të ketë rirenditje të strukturës drejtuese pasi, sipas tij, pasojat e menaxhimit të dobët ndikojnë në shërbim.
“Unë i kam kaluar dhjetë vite në Policinë e Kosovës dhe mendoj se Policia duhet të reformohet, veçmas menaxhmenti i lartë i Policisë. Duhet të ketë një rirreshtim ose një rirenditje totale e menaxhmentit të PK-së sepse pasojat i ka vetë shërbimi. Është mirë siç thuhet në gjuhën popullore ‘të ndahet shapi nga sheqeri’ dhe të fillohet me një riorganizim total brenda Policisë së Kosovës”, ka thënë ai.
Më tej, ai ka theksuar se trajnimi për zyrtarët policorë në të ardhmen duhet të zgjatet më shumë se 2 muaj.
“Unë e kam përmendur edhe më herët që trajnimi për një zyrtar policor është shumë i shkurtër 2 muaj kur pothuajse në shumicën e shteteve demokratike trajnimi është njëvjeçar. Unë besoj që kushdo që e merr në dorë Policinë në të ardhmen duhet të ulet dhe të mendoj që Policia e Kosovës ka nevojë më gjatë me u trajnu sesa 2 muaj”, ka shtuar ai.
Ndërkaq, reagimin e pesë zyrtarëve policorë në rastin e vdekjes së Agon Fejzullahut nga Lipjani, ish-hetuesi policor e ka parë më të ashpër se që është kërkuar.
“Natyrisht zyrtarët policorë duhet t’i përgjigjen situatës qoftë kur kërkohet nga vetë qytetarët apo kur takohen me probleme..Nga veprimet e viktimës më duket se ka qenë reagim pak më i ashpër sesa ka kërkuar situata. Sado që ai ndoshta do të kishte dëmtuar ndonjë veturë, prapë dëmet materiale janë të parëndësishme, krahasuar me jetën e njeriut”, ka deklaruar Mehmeti.
