Publicisti Kim Mehmeti ka deklaruar se Partia Demokratike nuk e dëshiron realisht largimin e kryeministrit të Shqipërisë Edi Rama, duke argumentuar se një pjesë e drejtuesve të opozitës janë përfituese të sistemit aktual.
Sipas Mehmetit, përfaqësuesit e opozitës shprehen publikisht se kërkojnë rrëzimin e qeverisë, por në thelb nuk synojnë ndryshimin e sistemit politik.
“Opozita, PD, nuk e do me të vërtetë rënien e Edi Ramës, sepse atje ke njerëz që janë pasuruar me miliona nga ky sistem. Ata çdo ditë, në konferenca, thonë se duan largimin e tij, por kjo nuk është e vërtetë. E thonë sepse duhet ta thonë, por në thellësi nuk e duan këtë, pasi janë pasuruar nga ky sistem dhe nuk duan rënien e tij”, ka deklaruar Mehmeti në emisionin “Këndi i Debatit” në Tëvë1.
Ai është shprehur se protestuesit kërkojnë një kontratë të re me qytetarët dhe një Shqipëri ndryshe, ndërsa opozita, sipas tij, nuk e mbështet këtë ndryshim me të njëjtin përkushtim.
Mehmeti ka shtuar se opozita, edhe kur deklaron mbështetje për protestat, në fakt i dëmton ato, pasi qëndrimi i saj nuk është i sinqertë.
“Ata nuk duan nënshkrimin e një kontrate të re me popullin dhe as një Shqipëri të re, siç e duan protestuesit. Me të njëjtin intensitet, por në një mënyrë tjetër, ata e luftojnë këtë protestë. Madje, nëse doni ta dini, këtë protestë e dëmtojnë edhe duke e përkrahur, dhe këtë e dinë edhe vetë kur dalin e thonë se kjo është një mrekulli”, ka thënë ai.
I pyetur për rolin që duhet të ketë opozita, Mehmeti ka thënë se ajo duhet të mbajë përgjegjësi për gjendjen në të cilën ndodhet vendi, po aq sa edhe mazhoranca.
“Opozita duhet të turpërohet për atë që i ndodh Shqipërisë, për atë ku ka ardhur Shqipëria, po aq sa edhe pozita”, ka përfunduar Mehmeti./teve1.info/
