Publicisti dhe analisti Kim Mehmeti ka reaguar ndaj deklaratave të ministres së Administratës Publike dhe Vetëqeverisjes Lokale të Serbisë, Snezhana Paunoviq, e cila ka deklaruar se, po të ishte në vend të ish-presidentit serb Sllobodan Millosheviq, do ta kishte kryer spastrimin etnik të Kosovës në vitin 1998.
Duke folur në emisionin “Këndi i Kimit” në TëVë1, Mehmeti tha se deklaratat e tilla janë pasojë e një mendësie që, sipas tij, është kultivuar ndër vite në shoqërinë serbe.
“Ajo nuk ndryshon, sepse ka të bëjë me një mendësi që është mbjellë që në fëmijëri. Ata ashtu edukohen, që armiq të natyrshëm janë shqiptarët. Në të vërtetë, ata lumturinë e vet e kanë lidhur me atë se, nëse nuk do të ekzistonin shqiptarët, do të ishin më të lumtur dhe më të begatë”, ka thënë Mehmeti.
Sipas tij, kjo qasje lidhet edhe me mënyrën se si, sipas tij, është ndërtuar koncepti politik dhe historik i Serbisë.
“Edhe ashtu është ndërtuar Serbia, sepse nëse e shihni Serbinë, ajo gjithmonë ka grabitur troje dhe është rritur. Edhe bota serbe ekziston mbi këtë bazë: ku shkon, nderon një kishë dhe pastaj e quan atë vend të shenjtë të vetin. Kjo nuk do të ndryshojë kurrë”, është shprehur Mehmeti.
Ai shtoi se deklaratat e tilla nuk e befasojnë, pasi i konsideron pjesë të një mendësie të njohur prej tij.
“Për mua ka diçka më tragjike se kjo. Kjo nuk më befason, sepse është një mendësi të cilën unë e njoh”, ka thënë Mehmeti.
