Publicisti, Kim Mehmeti ka deklaruar se posedon informacione për disa iniciativa që në Gjykatën Kushtetuese të Maqedonisë së Veriut të rishqyrtohen dosjet e rasteve të Hagës.
Mehmeti ka thënë se, sipas informatave që ka, këto iniciativa janë ndërmarrë nga individë dhe qarqe shqiptare, të cilat, sipas tij, e kundërshtojnë Bashkimin Demokratik për Integrim (BDI).
Në emisionin “Këndi i Debatit” në Tëvë1, ai ka shtuar se nuk e di nëse këto iniciativa do të realizohen, por ka theksuar se informacionet që ka i konsideron të besueshme.
“Kam disa informata, të cilat i konsideroj të sakta, se ka disa iniciativa që në Gjykatën Kushtetuese të rishqyrtohen dosjet e Hagës. Nuk e di sa do të realizohet. Mua më është thënë se kjo është iniciuar nga disa qarqe dhe individë shqiptarë, sepse atje e gjithë lufta bëhet mes shqiptarëve dhe për shqiptarët. Sipas mendimit tim, elitat politike dhe policore maqedonase na luftojnë ne shqiptarëve, por nëpërmjet vetë shqiptarëve.Unë kam informacione se këtë iniciativë e iniciojnë disa qarqe shqiptare sepse iu pengon BDI-ja”, ka deklaruar ai.
Në deklaratën e tij, Mehmeti ka kritikuar edhe BDI-në dhe udhëheqjen e saj për mënyrën se si, sipas tij, është trajtuar Marrëveshja e Ohrit.
“Asgjë nuk ka mbetur nga Marrëveshja e Ohrit, sepse ajo marrëveshje duhej të mbyllej. Për tre vjet, kryetari i BDI-së, derisa ishte në qeveri, nuk iu përkushtua edhe aq shumë kësaj marrëveshjeje e tani ka filluar ta kthej këtë marrëveshje”, është shprehur ai.
Mehmeti ka thënë se ajo që e shqetëson më shumë është mundësia që, sipas tij, shqiptarë të caktuar të kërkojnë masa ndaj shqiptarëve të tjerë.
“Unë nuk kam aq vlerësim për kryetarin e BDI-së. Bile, mendoj se për mëkatet që i ka bërë do të paguajë, sepse ai ka bërë mëkat që ka bërë tregti me Marrëveshjen e Ohrit për ta shpëtuar veten. Shumë mëkate ka bërë, aq sa njeriu të mos mund ta arsyetojë apo, për çfarëdo qoftë, t’i dhimbset.Mirëpo, mua ajo që më dhemb është kjo: si mundesh ti, si shqiptar, të shkosh diku dhe të thuash që ta mbyllin një shqiptar, sepse është shumë i rrezikshëm për Maqedoninë? Si mundesh?”, ka përfunduar Mehmeti./teve1.info/
