Publicisti, Kim Mehmeti ka reaguar ndaj një deklarate të fundit të kryeministrit të Shqipërisë, Edi Rama, i cili gjatë një aktiviteti për promovimin e sezonit turistik veror, tha se ‘shqiptarët janë ndotësit më të mëdhenj të parqeve dhe pikave turistike dhe jo turistët e huaj’.
Mehmeti, në emisionin “Këndi i Debatit” në Tëvë1 është shprehur se një deklaratë e tillë nuk i lejohet një kryeministri, duke e cilësuar si përbuzëse ndaj qytetarëve shqiptarë.
“Ky zotëri nuk guxon ta thotë atë, sepse ky nuk është publicist, ky është kryeministri i Shqipërisë. Ai duhet ta dijë një të vërtetë: se mos të ishin ‘shqipot’ nga turizmi nuk do të kishte asgjë. Rama e thotë ‘shqipot’ sepse ai i përbuz shqiptarët, se ai mendon që të jesh shqiptar nuk është edhe diçka e mirë. Ai nuk i respekton shqiptarët. Ai mendon që para shqiptarëve mund të dilet pa kravatë, si një bohem, se para shqiptarëve mund të dilet edhe i parregulluar, pasi sipas tij ata nuk e meritojnë. Ata janë ‘shqipo’, nuk marrin vesh ata dhe mendon se para shqiptarëve mund të thuash çfarë të duash e mund t’i akuzosh për çfarë të duash, mirëpo ata ta mbajnë turizmin”, ka thënë Mehmeti.
