Publicisti Kim Mehmeti ka komentuar protestat që po zhvillohen në Shqipëri, të cilat sipas tij kanë nxjerrë në pah gjendjen politike dhe shoqërore në vend.
Në emisionin “Këndi i Kimit” në Tëvë1, Mehmeti ka thënë se protesta ka shpalosur, sipas tij, shqetësimet për mënyrën se si po qeveriset Shqipëria.
“ Kjo protestë shpalosi diçka, që Shqipëria është bërë mall për shitje, që Shqipëria është e rrezikuar dhe që shqiptari ka rënë në duart e njerëzve të cilët fare nuk kanë të bëjnë dhe nuk punojnë për interesin shqiptar, por vetëm për interesin e një rrethi njerëzish”, ka deklaruar Mehmeti.
Ai ka kritikuar qeverisjen e kryeministrit të Shqipërisë, Edi Rama, duke thënë se për një dekadë vendi ka qenë në duart e njerëzve që, sipas tij, nuk kanë punuar për interesin e qytetarëve.
“Unë them se 10 vite Shqipëria është në duart e njerëzve të cilët fare nuk punojnë për interesin e saj. Shqipëria është e rrezikuar, mirëpo më keq se ç’i bëri Rama Shqipërisë askush nuk mund t’i bëjë. Asnjë spiun nuk mund t’i bëjë, është absurde dhe e rëndë ta thuash, por ai di ta përgjysmojë popullin”, ka thënë Mehmeti./teve1.info/
