Përmes një postimi në Facebook, Mehaj ka thënë se në këtë takim kanë diskutuar për rritjen e bashkëpunimit të Kosovës me Norvegjinë në fushën e mbrojtjes dhe sigurisë, në fushën e edukimit dhe arsimimit, si dhe arritjen e nënshkrimit të memorandumit të mirëkuptimit në mes të ministrive të mbrojtjes të të dy vendeve.
“Në Ministrinë i Mbrojtjes, kam pritur në takim delegacionin nga Mbretëria e Norvegjisë, të kryesuar nga Kjersti C Klaeboe, drejtore e Përgjithshme e Departamentit të Politikës së Personelit, Kompetencës, Integritetit dhe Shërbimeve të Përbashkëta Ligjore të Ministrisë së Mbrojtjes së Norvegjisë. Gjithashtu, pjesë e delegacionit ishte ambasadori norvegjez në Kosovë, Jens Erik Grondahl si dhe zyrtarë të lartë të Ministrisë së Mbrojtjes së Norvegjisë. Në këtë takim dikutuam për rritjen e bashkëpunimit të Republikës së Kosovës me Norvegjinë në fushën e mbrojtjes dhe sigurisë, në fushën e edukimit dhe arsimimit, si dhe arritjen e nënshkrimit të Memorandumit të Mirëkuptimit në mes të ministrive të mbrojtjes të të dy vendeve”, ka shkruar ai.
Mehaj ka falënderuar Norvegjinë për mbështetjen e vazhdueshme ndaj Kosovës në fushën e mbrojtjes dhe sigurisë.
“Falënderim për shtetin norvegjez për mbështetjen e vazhdueshme dhe shumë të rëndësishme që Norvegjia i ka dhënë Kosovës në fushën e mbrojtjes dhe sigurisë, ngritjen e kapaciteteve të Ministrisë së Mbrojtjes dhe FSK-së, ndihmën e dhënë për luftimin e pandemisë me Covid-19, si dhe në shumë fusha tjera. Theksova se shteti norvegjez ka qenë dhe është i përkushtuar për mbështetjen në ndërtimin, zhvillimin dhe avancimin e vendit tonë”, tha ai. /teve1.info/
