Mediumi austriak OE24 raporton se Serbia po përballet me një rikthim të rrezikshëm drejt praktikave të viteve ’90, kur pushteti politik kishte kontroll të plotë mbi ushtrinë dhe policinë – një situatë e ngjashme me periudhën e Slobodan Milosheviqit.
Sipas gazetës, ndryshimet e reja ligjore të presidentit Aleksandar Vuciq po çojnë vendin drejt centralizimit të plotë të pushtetit në duart e shefit të shtetit.
OE24 shkruan se projektligji për ndryshimin e Ligjit për Ushtrinë pritet të miratohet së shpejti dhe do t’i mundësojë Vuciqit që të shpallet zyrtarisht komandant i përgjithshëm i forcave të armatosura. Ndryshe nga ligji aktual – ku presidenti as nuk përmendet në këtë rol – versioni i ri kërkon që shefi i Shtabit të Përgjithshëm dhe oficerët kryesorë të veprojnë “në përputhje me vendimet e presidentit”.
Sipas gazetës, ky konsolidim autoritar nuk kufizohet vetëm në ushtri. Ndryshimet e fundit në polici tregojnë se ky institucion po vihet gjithashtu nën kontroll të drejtpërdrejtë të Vuciqit. OE24 citon revistën beogradase “Radar”, e cila vlerëson se “rruga drejt kthimit të policisë në një filiale të Partisë Progresive Serbe, e nisur në vitin 2014, është thuajse e përfunduar”.
Si shembull, artikulli përmend promovimin e Marko Kriçakut, shefit të njësisë speciale për mbrojtjen e objekteve, i njohur për brutalitetin ndaj studentëve protestues – një lëvizje që, sipas OE24, tregon se “as nuk po mundohet më të ruhet fasada e profesionalizmit”.
Eksperti ushtarak Aleksandar Radiq paralajmëron se ndryshimet ligjore në ushtri përbëjnë “kthim në vitet ’90”, kur Shtabi i Përgjithshëm ishte nën kontroll të drejtpërdrejtë të Milosheviqit. Nga ana tjetër, gjenerali në pension Momir Stojanoviq i quan ndryshimet “absurde”, duke theksuar se Serbia në teori ka sistem parlamentar — por vetëm në letër.
“Në realitet, shumica e qytetarëve e dinë se asnjë vendim nuk merret pa miratimin e presidentit”, përmbyll raportimi i OE24.
