Mediat kryesore ndërkombëtare e kanë paraqitur zgjedhjen e Justina Shiroka-Pulës presidente të Kosovës si rezultat të një marrëveshjeje politike që i mundësoi vendit t’i shmangte zgjedhjet e reja parlamentare.
Reuters, Associated Press (AP) dhe Agence France-Presse (AFP) theksojnë se votimi u zhvillua në minutat e fundit para skadimit të afatit kushtetues, pas një marrëveshjeje mes Lëvizjes Vetëvendosje dhe Partisë Demokratike të Kosovës për ndryshimin e ligjit që rregullon Dhomat e Specializuara në Hagë.
Sipas Reuters dhe AP, Kuvendi e zgjodhi Shiroka-Pulën me 81 vota, në një seancë të gjatë dhe të tensionuar. Mediat e lidhin drejtpërdrejt votimin me krizën e gjatë politike, e cila ka sjellë bllokim institucional dhe dy palë zgjedhje të parakohshme.
Reuters vlerëson se dështimi për zgjedhjen e presidentes do ta çonte vendin sërish në zgjedhje, ndërsa AP e përshkruan votimin si një moment të rëndësishëm për kapërcimin e krizës politike.
Në fokus të raportimeve është edhe ligji për Dhomat e Specializuara. AFP thekson se ndryshimet, të miratuara pak para zgjedhjes së presidentes, synojnë të kufizojnë kompetencat e gjykatës, përfshirë kufizimin e dënimeve, mundësinë e vuajtjes së tyre në Kosovë dhe zgjerimin e mundësive për falje presidenciale.
Mediat nënvizojnë se ndryshimet nuk prekin dënimet e dhëna tashmë ndaj ish-krerëve të UÇK-së, të cilët mund t’i apelojnë ato përmes procedurave ekzistuese.
Al Jazeera e vendos zhvillimin në një kontekst më të gjerë të përplasjeve politike dhe protestave pas dënimeve të ish-krerëve të UÇK-së. Ajo thekson se lidhja e votimit për presidente me ndryshimet në ligjin për Dhomat e Specializuara ka qenë pjesë e një negocimi politik të kontestuar.
Analistët e cituar nga kjo media paralajmërojnë se çështja e Hagës mund të vazhdojë të ndikojë në politikën e brendshme të Kosovës. Protestat dhe përplasjet me policinë, përfshirë përdorimin e gazit lotsjellës dhe ujitësve të policisë, janë gjithashtu pjesë e raportimeve.
Në përgjithësi, mediat ndërkombëtare e shohin zgjedhjen e Shiroka-Pulës si shmangie të një krize të re institucionale dhe të zgjedhjeve të parakohshme, por theksojnë se marrëveshja që e mundësoi atë ka lidhur dy çështje të ndjeshme: zgjedhjen e presidentes dhe ndryshimin e kompetencave të Dhomave të Specializuara në Hagë.
