Nuk ka gëzim më të madh për një futbollist se sa në momentin kur topi i goditur prej tij kalon vijën fatale dhe shkund rrjetën e kundërshtarëve. Sigurisht, nisur edhe nga roli në fushë, disa futbollistë e shijojnë pak ose rrallë këtë ndjesi.
Megjithatë, edhe pse duket e çuditshme, ka edhe nga ata të cilët nuk e kanë provuar kurrë si është të festosh një gol në elite dhe jo kur bëhet fjalë për seanca stërvitore.
Fati i keq në këtë rast është për Alessandro Agostini i cili nga sezoni 1994-1995 është i vetmi lojtar në Serie A (përjashto këtu portierët) që ka grumbulluar 337 ndeshje, por pa arritur të shënojë në asnjë prej tyre. I lindur në vitin 1979 dhe i rritur në sektorin e të rinjve të Fiorentinës, Agostini u dërgua në huazim në vitin 1998 te Pistoiese me të cilën shënoi golin e vetëm në karrierë, në Kupën e Italisë. Pas një huazimi tjetër te Ternana këtë herë, rikthehet në shtëpi te Fiorentina në sezonin 2001-2002. Një sezon i cili përkon me një dështim total të klubit vjollcë që rrëzohet një kategori më poshtë dhe falimentimin e shoqërisë.
Në vazhdim, Agostini huazohet te Empoli, që e dërgon më pas te Siena dhe nga aty vjen Cagliari në vitin 2004. Në klubin nga Sardenja, Agostini qëndron për tetë vite por për të shënuar gol nuk bëhet fjalë edhe pse koleksionon 266 paraqitje me fanellën kuqeblu. Por, fati nuk ndryshon as kur transferohet te Torino e më pas te Verona ku mbyll karrierën në vitin 2015.
Kështu, sipas statistikave të Opta, Agostini nga sezoni 1994-1995, bëhet i vetmi lojtar pa përfshirë portierët që luan mbi 300 ndeshje, saktësisht 337 pa arritur të shënojë të paktën një gol. Për ironi të fatit, tashmë Agostini në rolin e trajnerit zëvendëson Mazzarin te Cagliari dhe do të jetë ai i cili duhet të bëjë skuadrën të gjejë rrugën e rrjetës nëse kërkon të mbijetojë në Serie A, edhe pse ai nuk është mësuar ta dërgojë topin pas shpinës së portierëve kundërshtarë.
