Komisioneri i Lartë i Kombeve të Bashkuara për Refugjatët, Filippo Grandi, njoftoi të enjten se më shumë se 2 milionë sirianë – përfshirë refugjatë dhe të zhvendosur brenda vendit – janë kthyer në shtëpitë e tyre që nga dhjetori.
“Mbi dy milionë refugjatë sirianë dhe të zhvendosur janë kthyer në shtëpi që nga dhjetori – një shenjë shprese mes tensioneve në rritje rajonale,” shkroi Grandi në një postim në platformën X.
Ai theksoi se ishte duke udhëtuar nga Libani drejt Sirisë me rastin e Ditës Botërore të Refugjatëve, duke ritheksuar domosdoshmërinë e një “zgjidhjeje politike” për konfliktin sirian. “Kjo vërteton se kemi nevojë për zgjidhje politike, jo për një valë tjetër paqëndrueshmërie dhe zhvendosjeje,” tha ai.
Kthimi masiv i qytetarëve vjen pas një periudhe të gjatë vuajtjesh dhe kushteve të vështira në kampet e refugjatëve, si dhe përmirësimit të dukshëm të sigurisë në disa pjesë të Sirisë pas rrëzimit të regjimit të Bashar al-Assad.
Miliona sirianë ishin detyruar të largoheshin nga vendi i tyre gjatë viteve të luftës civile, duke kërkuar strehim në shtetet fqinje përballë shkatërrimit të gjerë dhe krizës humanitare.
Rënia e Assadit, i cili kishte udhëhequr vendin për afro 25 vjet, erdhi në dhjetor kur ai u largua drejt Rusisë, duke i dhënë fund dekadave të sundimit të Partisë Baath që kishte qenë në pushtet që nga viti 1963.
Pas largimit të tij, Ahmad al-Sharaa u shpall president i përkohshëm në fund të janarit, duke hapur rrugën për një tranzicion politik në Siri.
