Gjykata Themelore në Ferizaj i ka caktuar masën e paraburgimit prej një muaji ndaj A.R., e dyshuar për vrasjen e F.H. në Ferizaj më 28 qershor.
Sipas vendimit të gjykatës, të siguruar nga “Betimi për Drejtësi”, e dyshuara para hetuesve policorë ka deklaruar se viktima paraprakisht e kishte kërcënuar përmes rrjetit social “Snapchat”. Sipas saj, F.H. ndër të tjera i kishte thënë “më prit se tani do të vij të vras ty dhe familjen tënde”.
Në vendim thuhet se në ato momente, e pandehura nga vrima vëzhguese e derës së banesës e sheh se para derës së saj ndodhet tani i ndjeri F.H., duke e pritur. Aty thuhet se kjo situatë të dyshuarën e vendosi në shok të rëndë sepse nuk e kishte pritur se tani i ndjeri realisht të shkonte te banesa, pasi siç ka thënë e pandehura, viktima edhe në 3-4 raste të tjera e ka kërcënuar në mënyrë të njëjtë, por nuk ka shkuar asnjëherë.
Gjithnjë sipas vendimit, pasi F.H. ka hyrë në banesë, e kapë për flokë të dëmtuarën dhe fillon ta godasë në kokë. Në vendim theksohet se e pandehura në vazhdimësi ka qenë e sulmuar dhe në atë moment e mori një shishe të xhamit me qëllim që ta frikësojë viktimën që mos ta vazhdojë sulmin, ku vetë e pandehura ka marrë lëndime trupore gjatë kësaj përleshjeje fizike.
Në vendim thuhet se gjatë gjithë kësaj kohe, tani i ndjeri e ka pasur armën në dorë dhe për një moment gjatë përleshjes e pandehura arrin t’ia marrë armën nga dora pasi që në një dhomë tjetër në atë banesë kanë qenë edhe prindërit e të pandehurës, e kështu të mos ndodhë ndonjë e keqe. Në momentin kur e kapë armën në dorë, A.R. thuhet se deklaroi që tani i ndjeri kthehet me shpinë nga tavolina dhe në atë moment të pandehurës i shkrep arma, ku si pasojë mbeti i vrarë F.H.
Avokati i të pandehurës, Genc Kadriu, që është caktuar sipas detyrës zyrtare, ka kundërshtuar kërkesën e Prokurorisë për caktim të masës së paraburgimit, duke thënë se sipas bindjes së tij, e pandehura ka vepruar në mbrojtje të nevojshme dhe se nuk ka pasur qëllim që me dashje ta privojë nga jeta të ndjerin. E dyshuara A.R. nuk u deklarua në seancë “për shkak të gjendjes emocionale”.
Në fund, gjykata vendosi t’ia caktojë një muaj paraburgim.
