Me rritjen e temperaturave, rritet edhe rreziku nga paraqitja e rriqrave.
Një nga komunat më të prekura nga ky fenomen në Kosovë mbetet Malisheva.
Ndërsa Caralluka vazhdon të konsiderohet si fshati ku janë regjistruar më së shumti raste ndër vite.
Megjithatë, banorët e këtij fshati thonë se këtë vit, situata është dukshëm më e qetë dhe se janë evidentuar vetëm raste të pickimeve.
“Në fillim këtu ka do vite pak më të hershme ka qenë situatë pak më kritike, por me intervenimin e Komunës edhe Ministrisë së Bujqësisë, situata për momentin është stabile. Ka disa raste të vogla, por nuk janë sa me thonë raste kritike”, tha banori Ruzhdi Krasniqi.
E përveç qytetarëve, Ruzhdi Krasniqi, fermer në këtë fshat, tregon se rriqrat zakonisht ngjiten edhe në pjesët më të ndjeshme të trupit të kafshëve.
“Më së shumti rriqni ngjitet nëpër vende të holla. Për shembull te lopët ndikon te gjiri, kur t’i mjelum i kqyrim, i pastrojmë, ja hekim atë. Por lopët para një muaji, një muaj e gjysëm ka intevenu veterinaria në Malishevë, i kemi stërpik shtallën, lopët. Për momentin janë qetë”.
Se këtë vit ka pasur më pak raste e thonë edhe nga Komuna e Malishevës.
“Nëse bëjmë krahasim të numrit të rasteve, mund të themi që këtë vit kemi më pak raste. Ndoshta pse ka qenë moti jo i mirë në fillim të vitit, ka qenë më i ftohtë dhe kanë filluar më vonë të paraqiten rastet. Ndoshta për shkak të dezinsektimit, repelimit, e të tjera. Domethënë, edhe moti, por edhe zbatimi i masave ndikojnë sigurisht. Por, ashtu siç e thashë, e mira e gjithë kësaj është se nuk kemi raste të infeksionit”, tha Artan Paçarizi nga Komuna e Malishevës.
Për të parandaluar përhapjen e rriqrave, Komuna thotë se ka vazhduar trajtimin e zonave endemike në bashkëpunim me institucionet qendrore.
“Në bashkëpunim edhe me nivelin qendror, përkatësisht me Institutin Kombëtar të Shëndetësisë Publike dhe Agjencinë e Ushqimit dhe Veterinarisë, është duke u bërë dezinsektimi i zonave endemike, jo i gjithë territorit të Malishevës, sepse s’kanë paraparë ose s’kanë dhënë mjete për dezinfektim në tri vitet e ardhshme, por është duke u bërë në ato zona ku ka raste më shumë, ose ku regjistrohen raste më të mëdha të thumbimeve nga rriqrat”, tha ai.
Deri në muajin maj, në këtë komunë ishin raportuar 118 thumbime nga rriqrat, gjersa asnjë s’ishte infektuar.
Vite më parë, numri i pickimeve kishte arritur deri në mbi 800.
Periudha më e rrezikshme për paraqitjen e rriqrave konsiderohet të jenë muajt nga fillimi i pranverës deri në fund të stinës së verës.
