Ka përfunduar protesta e thirrur nga Sali Berisha para parlamentit të Shqipërisë. Qytetarët qëndruan për gati dy orë, ndërsa herë pas herë pati edhe tensione e përplasje me policinë.
Protestuesit në disa momente hodhën në drejtim të efektivëve lëndë piroteknike, shashka dhe sende të forta, e për pasoja mbetën të lëndua 3 policë.
Një prej tyre mori dëmtime në sy, ndërsa dy të tjerët u dëmtuan në duar edhe në këmbë, por fatmirësisht për të tre lëndimet nuk kanë qenë serioze.
Pas përfundimit të protestës, policia ashtu si në 11 shkurt rrethoi zonën me shirit, ndërsa deri më tani nuk ka asnjë të shoqëruar, raporton abcnews.albania
Nisja e protestës:
Protesta ashtu siç ishte paralajmëruar nisi rreth orës 17:00, ndërsa Berisha doli në këmbë nga “selia blu” pak para kësaj ore për të marrë pjesë në seancën plenare.
Pak pas fillimit të seancës, seanca u pezullua për disa minuta për shkak të një problemi teknik, ndërsa jashtë Kuvendit nisën tensionet e para.
Fillimisht ishin 3 deputetët e përjashtuar të Partisë Demokratike, Albana Vokshi, Luan Baçi dhe Luçiano Boçi, të cilët u përplasën me gardën me pretendimin se masa e dhënë ndaj tyre nuk përfshinte mos futjen e tyre në parlament, por vetëm heqjen e të drejtës së fjalës.
Një pretendim që nuk qëndronte ky pasi sipas rregullores së parlamentit, një masë e tillë nënkupton edhe mosprezencën fizike në parlament.
Vazhdimi i protestës:
Pasi protestuesit panë në “led wall” skenën e ofruar nga deputetët, nisën tensionet me policinë duke tentuar të çanin kordonin, por nuk ia arritën.
Në podium nisën ta mbaheshin fjalimet para dhe ku herë pas herë transmetohej ajo ç’ka ndodhte në ambientet e brendshme, me Berishën që bllokonte foltoren dhe futej live në “facebook” dhe Nokën që i binte pa ndalim bilbilit duke bërë zhurmuesin, ndërsa tensionet mes turmës dhe policisë u rritën.
Me Luçiano Boçin në krye, protestuesit u përplasën fizikisht me policinë, duke hedhur ndaj tyre lëndë piroteknike dhe sende të forta, duke lënduar 3 efektivë.
Më vonë protestës iu bashkua edhe kreu i Partisë së Lirisë, Ilir Meta.
Përfundimi:
Pas përfundimit të seancës plenare, e cila u mbyll me përjashtimin e Flamur Nokës, Berisha fillimisht foli për mediat në dalje të kuvendit, pak metra nga protestuesit dhe më pas mbajti një fjalim të shkurtër në podium para tyre.
Në fjalën e tij ish-kryeministri u shpreh se prania e qytetarëve ka qenë një mbështetje e jashtëzakonshme për ta dhe kauzën e tyre, ndërsa fjalën e fundit e tha nga shkallët e “selisë blu” ku theksoi se beteja për revolucionin demokratik do të vazhdojë deri në fitore.
