Me këngë nacionaliste, e me pankarta në duar u nisën drejt Beogradit.
Në këtë video të siguruara nga Tëvë1, ky grup serbësh, në duar mbajtën edhe mbishkrimin “Kosova është serbi”.
Të martën, ata morën rrugë nga Zubin Potoku në Serbi, duke iu përgjigjur kështu ftesës së presidentit serb, Aleksandar Vuçiq i cili do të mbajë një takim me mbështetës të tij më 15 prill.
Ish-deputeti në paralamentin serb, Dragan Sormaz thotë për Tëvë1 se serbët nga Kosova po kërcënohen nga Millan Radojiçiq me grupet e tij.
“Vuçiçi po provon të kopjojë këtë, kështu që do të bëjë marshet e veta, por me kë? Dhe kjo përgjigje ju mjafton, “me kë?” Mundet vetëm me serbët nga Kosova sepse këtu askush nuk do të përzihet sepse nuk dua t’i shohin që po bëjnë këtë. E ata (serbët nga Kosova) janë të nënçmuar me pak para që mund të merr dikush, të frikësuar nga ana e Radojçiçit dhe kriminelëve të tij, e mund të jetë edhe dikush nga ta në mesin e atyre 200 që po ecin me ta. Pastaj ai zgjedh ata si këmbësorë, të cilët veç janë xhiruar të barten me automjete të xhandarmërisë nga një vend në tjetrin, e pastaj i xhirojnë me kamerë si ecin pakëz në këmbë”, thotë Dragan Sormaz.
Profesori i kriminalistikës, Fatmir Çollaku, mendon se kjo mund të përdoret edhe për ngritje të tensioneve në veri.
Sipas tij, shumica e serbëve në veri e kanë kuptuar propagandën e presidentit serb, Vuçiq.
“Pa mëdyshje që kërkesat e tij për t’i dhënë detyra apo për t’i vënë në aksione në aktivitete, për interes së qeverisjes së tij, dhe politikës së tij, janë lojal janë një strukturë e caktuar. Popullata shumicë në veri kanë kuptuar edhe mashtrimet edhe kanë kuptuar demagogjinë e Vuçiqit dhe janë për jetë në veriun e Kosovës”, thotë Çollaku.
Çollaku tregon se si po instrumentalizohen disa grupe serbe në veri.
“Duke i instrumentalizuar përmes formave të ndryshme, gjatë mandateve të tij në qeverisjen e Serbisë përkatësisht në presidencë. Ai ka ushtruar ndikim dhe vazhdon të ketë edhe më tutje te serbët e veriut”, tha ai.
Në mënyra të ndryshme e të ndarë në grupe, muaj më parë, mbështetës të Vuçiq shkuan në Beograd për të kundërshtuar protestën e studentëve, ku po vazhdon të kërkohet largimi i Aleksandër Vuçiq nga posti i tij.
