Kryeministri i Kosovës ka vazhduar takimet në Bosnje e Hercegovinë ku ka takuar anëtarin kroat të presidencës Zhelko Komshiq dhe atë boshnjak, Denis Beqiroviq me të cilin kanë biseduar rreth mundësive të bashkëpunimit ndërmjet dy shteteve. Dy anëtaret falënderuan, Kurtin për heqjen e vizave për qytetarët e Bosnje e Hercegovinës.
Kryeministri i Kosovës edhe këtë të premte ka qëndruar në Bosnje e Hercegovinë.
Ai është takuar me dy anëtarë të presidencës tre paleshe të këtij shteti.
Pas takimeve të ndara që Kurti pati me anëtarin kroat të presidencës, Zhelko Komshiq dhe atë boshnjak, Denis Beqiroviq, nga zyra e Kryeministrit dhanë detaje rreth temave të diskutuara.
“U shqyrtua mundësia e organizimit të një forumi të përbashkët ekonomik, dhe për të shtuar shkëmbimet në kulturë dhe edukim. Kryeministri theksoi se njoftimi i Qeverisës së Republikës së Kosovës sipas së cilit nga 1 janari i vitit të ardhshëm, pra më pak se një muaj, qytetarët e Bosnjës dhe Hercegovinës do të mund të udhëtojnë drejt Kosovës me letërnjoftime, do të kontribuojë shumë në rritjen e bashkëpunimit dhe miqësisë ndërmjet dy vendeve”, thuhet nga Zyra e Kryeministrit.
Përmes një postimi në facebook, anëtari kroat i Presidencës, Komshiç falënderoj Kurtin për heqjen e vizave për qytetarët e Bosnjë dhe Hercegovinës.
“Vlerësojmë një hap të tillë të jashtëzakonshëm të njëanshëm dhe, për këtë arsye, të pazakontë. Ky veprim sigurisht do të kontribuojë në lidhjen më të mirë të qytetarëve të Bosnjë dhe Hercegovinës dhe Kosovës, si dhe në rritjen e shkëmbimeve të ndërsjella tregtare”, tha Komshiç.
Edhe anëtari boshnjak i presidencës së Bosnje e Hercegovinës kërkoj bashkëpunimin ndërmjet të gjitha vendeve të Ballkanit Perëndimor.
Derisa shkroi edhe rreth njohjes së Kosovës nga Bosnja e Hercegovina.
“Sot nuk diskutohet për njohjen e Kosovës, sepse të gjithëve u është bërë e qartë se për një vendim të tillë nevojitet konsensus në Presidencën e Bosnjës dhe Hercegovinës. Njerëzit e përgjegjshëm gjithmonë duhet të këmbëngulin në respektimin e parimeve të kushtetutshmërisë dhe ligjshmërisë, por edhe në biseda konstruktive për zbatimin e marrëveshjeve të nënshkruara në Procesin e Berlinit. Askush nuk do të lejohet të mendojë se mund të disiplinojë udhëheqësit e shtetit të Bosnjës dhe Hercegovinës dhe të përcaktojë me kë, ku dhe kur mund të bisedojnë. Kjo është diçka që duhet ta harrojnë përgjithmonë”, tha anëtari boshnjak i Presidencës, Denis Beqiroviq.
Kryeministri Kurti të premten bëri homazhe pranë Memorialit të Fëmijëve të Vrarë gjatë Rrethimit të Sarajevës ku ishte i shoqëruar nga zëvendëskryeministrja Emilja Rexhepi dhe ambasadori i Kosovës në Kroaci, Martin Berishaj.
Ai nisi vizitën në Sarajevë më 5 dhjetor dhe gjatë qëndrimit në Bosnje do të mbajë edhe një fjalim në një konferencë për raportet rajonale që organizohet nga “Asociacioni i Intelektualëve të Pavarur Krug 99”.
Për shkak të vizitës së Kurtit në Sarajevë, më 5 dhjetor ministrat nga Republika Sërspak thanë se nuk do të marrin pjesë në mbledhjen e Këshillit të Ministrave të Bosnje e Hercegovinës.
