Kodimin për robot e bënë përmes laptopëve.
E pavarësisht pajisjeve të vjetra teknologjike, shkolla ‘’Naum Veqilharxhi’’ nga Mohlani i Suharekës u kualifikua në finalen e garave shtetërore të robotikës.
Mirëpo gjatë tri raundeve të garave, nxënësit e kësaj shkolle thonë se kanë hasur në vështirësi.
“Kemi pasur pak probleme me laptopa për shembull problemet teknike, në momentin kur kemi punu, ndonjëherë laptopat nuk na kanë punu. Ndoshta edhe pse e kemi bo punën krejt mirë atëherë në momentin që kemi shku në praktikë kemi pasur shumë probleme”, ka thënë Blinera Dakaj, nxënëse e shkollës “Naum Veqilharxhi”.
Prandaj, Dakaj ka një kërkesë për institucionet.
“Na kemi me vazhdu me bo kërkesa gjithmonë që me na u avancu mjetet që i kemi, sidomos mjetet teknologjike, se teknologjia po mbizotëron në kohën ku ne po jetojmë”, ka thënë ajo.
E pavarësisht kësaj, mësuesja e teknologjisë, Rina Ramshaj, arritjen në finale e vlerëson sukses të madh.
“Për neve është vlerësim shumë i madh sepse si fillestarë do të thotë shumë, sepse si fillestarë në garë e poashtu edhe në teknologji sepse fëmijët nuk kanë pasur qasje dhe kontakt me kodim apo me robotikë, kështu që është sukses i madh”, shprehet mësimdhënësja.
Në shkollën ‘’Naum Veqilharxhi’’, janë gjithsej katër laptopë.
Por nga drejtoria e shkollës thonë se nuk kanë mundësi të bëjnë më shumë.
“Kërkojnë kushte por mundësitë nëpër shkolla nuk janë të favorshme që ne vet me i siguru dmth ato mjete teknologjike. Kërkesat janë të vazhdueshme të mësimdhënësve e të nxënësve por këto janë ato që kemi mundësi na me i bo”, ka thënë drejtoresh e shkollës Liridona Kabashi.
Nxënësit e shkollës ‘’Naum Veqilarxhi’’ në garat shtetërore të robotikës po marrin pjesë për herë të parë.
Kjo shkollë është ndër pesë shkollat e komunës së Suharekës, e cila ka arritur finalen e madhe të robotikës në Kosovë.
