Shumë autobusë e vetura me targa të Serbisë arritën në Mitrovicën e Veriut.
E ndalesën këta serbë e patën në Sallën e Sporteve.
Ata erdhën nga vende të ndryshme prej Serbisë për të përkrahun Listën Serbe, e cila të mërkurën e bëri hapjen e fushatës zgjedhore.
Madje disa prej tyre kishin marrë me vete edhe flamujt e Serbisë.
Për monitorim ishin edhe zyrtarë të Policisë së Kosovës, të Njësisë Speciale dhe patrulla të EULEX-it.
Ngjyrat e flamurit të tyre nuk munguan as brenda sallës.
Me duartrokitje e këngë serbe e bënë edhe pritjen e përfaqësuesve të Listës Serbe.
Ai që e mori fjalën para masës ishte i pari i komunës së Mitrovicës së Veriut, Milan Radojevic, duke thënë se ka qenë kohë e vështirë.
“Periudha e vështirë është pas nesh, tre vitet e kaluara nuk kanë qenë të lehta, e vetmja që ka qenë gjithmonë me ne është Serbia. Vetëm Serbia ka qenë me ne dhe do të mbetet me ne”,ka thënë Radojeviq.
Radojeviq e përmendi edhe Kurtin, që sipas tij Mitrovicën po e përdor vetëm për poenë politik.
“Ky vit ka qenë plot sfida për ne. E nisëm me zgjedhjet e shkurtit, në të cilat fituam bindshëm, por na u vodh një mandat. Filluam një valë ndryshimesh që vazhdon. Pastaj, në shkurt, ju premtuam se nuk do të kishte koalicione me Kurtin. E përmbushëm premtimin. Falë jush, falë mbështetjes suaj, votave tuaja, në tetor fituam dhe fituam një fitore edhe më bindëse në zgjedhjet lokale, duke ju kthyer katër komunat veriore juve qytetarëve, shpëtuam gjashtë komuna në jug”, ka thënë tutje Radojeviq.
Gjatë javëve të kaluara, Komisioni Qendror Zgjedhor nuk e certifikoi Listën Serbe për shkak që anëtarët e partive shqiptare votuan kundër dhe abstenuan, derisa certifikimin ia dha Paneli Zgjedhor për Ankesa dhe Parashtresa.
