Ministria e Infrastrukturës dhe Transportit ka njoftuar qytetarët se më 5, 6 dhe 7 qershor 2026 do të organizohet Gara Ndërkombëtare e Çiklizmit në disa segmente rrugore të Republikës së Kosovës, përfshirë autostradat “Arbën Xhaferi” dhe “Ibrahim Rugova”.
Sipas njoftimit, gjatë zhvillimit të garës do të ketë mbyllje të përkohshme të një korsie të qarkullimit në segmentet e parapara, sipas itinerarit të përcaktuar për secilën ditë të aktivitetit.
Më 5 qershor (e premte), nga ora 13:00, do të mbyllet njëra korsi në autostradën “Arbën Xhaferi”. Nisja do të bëhet nga sheshi “Metush Krasniqi” në Kamenicë, në drejtim të Prishtinës, ndërsa përfundimi i itinerarit është në kilometrin 28.
Më 6 qershor (e shtunë), mbylljet e përkohshme do të përfshijnë disa segmente rrugore, përfshirë rrugët Ferizaj (Bibaj) – Lipjan – Hani i Elezit, në distanca dhe orare të ndryshme gjatë ditës, duke filluar nga ora 09:00 deri në ora 16:00.
Ndërkaq, më 7 qershor (e diel), garat do të zhvillohen në itinerare më të gjata që përfshijnë Ferizajn, Podujevën, Lipjanin, Fushë Kosovën, Llapushnikun dhe Duhlin, me mbyllje të një korsie të qarkullimit në orare të ndryshme gjatë ditës.
Për mbarëvajtjen e garës dhe sigurinë e pjesëmarrësve, Federata e Çiklizmit e Kosovës do të bashkëpunojë ngushtë me Policinë e Kosovës dhe institucionet kompetente.
Ministria e Infrastrukturës dhe Transportit ka kërkuar mirëkuptimin e qytetarëve, duke apeluar për respektimin e udhëzimeve të Policisë së Kosovës, zyrtarëve të garës dhe sinjalizimit rrugor përgjatë itinerareve./teve1.info/
