Policia e Kosovës ka identifikuar një veturë që po lëvizte me shpejtësi tej normave të lejuara në autostradën “Dr. Ibrahim Rugova”.
Sipas njoftimit të Policisë, rasti ka ndodhur në kuadër të planit operativ “Road Pool”, ku një automjet është kapur duke qarkulluar me rreth 182 km/h në një zonë ku kufizimi i shpejtësisë është 120 km/h.
“Policia e Kosovës me datën 15.04.2026 në kuadër të planit operativ Road Pool, në autostradën Dr Ibrahim Rugova ka identifikuar një veturë të dyshuar, e cila në zonën e kufizimit 120km/h ka qenë duke lëvizur me shpejtësi rreth 182km/h”, thuhet në njoftim.
Autoritetet bëjnë të ditur se ndaj shoferit janë ndërmarrë masa ndëshkuese.
“Lidhur me rastin, për shkeljen e kryer ndaj shoferit janë ndërmarrë masa ligjore për ndalim drejtimit të automjetit për 3 muaj si dhe i janë shqiptuar pikë negative, po ashtu për shkak të afatit të skaduar të regjistrimit të automjetit është bërë edhe konfiskimi i targave”, njofton Policia.
Policia e Kosovës ka ritheksuar përkushtimin e saj për sigurinë në trafik dhe parandalimin e aksidenteve.
“Policia e Kosovës mbetet e përkushtuar që të ushtroj autorizimet e saj në mbikëqyrjen e komunikacionit rrugor, me qëllim të parandalimit të shkeljeve në trafik dhe parandalimit të aksidenteve”, thuhet më tej në njoftim.
