Me pajtim të palëve, 1 marsi u caktua si datë për fillimin e gjyqit.
Prokuroria ka treguar orët që do t’i duhen për ta paraqitur lëndën e saj, të mbështetur në 323 dëshmitarë.
“Do na duhen pak më shumë 700 orë, për të paraqitur argumentet e çështjes. Është e mundur që gjatë gjyqit, dëshmitarët të paraqesin dëshmi që ta bëjnë të panevojshëm paraqitjen e dëshmitarëve të mëvonshëm por kjo do të varet nga zhvillimet gjatë gjykimit”, tha Matthew Howling – Prokuror i Specializuar.
Bazuar në këto shifra, trupi gjykues shprehi shqetësim për kohëzgjatjen potenciale të gjykimit të ish krerëve të UÇK-së.
“Ne kemi treguar vizionin tonë lidhur me ditët e seancave për periudhën në vazhdim, dhe nëse kjo funksionon siç duhet do të dëgjohen dëshmi për 600 orë në një vit dhe mund të them që nga përvoja ime që asgjë nuk është perfekte dhe gjyqi mund që zgjasë më shumë sesa shpresojmë. Ne presim që ky gjyq të jetë i gjatë dhe ne vlerësojmë që periudha pesë vjeçare që parashikohet ka shqetësime të mëdha”, deklaroi Charles Smith – kryetar i Trupit Gjykues.
Ekipet mbrojtëse kundërshtuan edhe në këtë konferencë përgatitore përmbajtjen e aktakuzës dhe pretendimet për vrasje të popullsisë civile.
“Nuk është sulmuar popullata civile, nuk ka pasur sulme sistematike apo të gjerësishme. Dy trupe gjykuese kanë arritur në përfundimin që UÇK nuk ka pasur politikë për të sulmuar popullatën civile Në rastin Haradinaj e Limaj janë dy zona të ndryshme në territorin e Kosovës. Në rastin Limaj nuk ka pasur dëshmi që dëshmojnë që UÇK ka sulmuar popullatën civile”, deklaroi Ben Emmerson – avokat i Veselit
Prokuroria njoftoi se për hyrjen e saj do t’i duhen 6 orë, kurse mbrojtjes së viktimave 45 minuta.
Numër më të madh të orëve për fjalën hyrëse, parashikoi mbrojtja e Thaçit me 3-4 orë, pasuar nga e Krasniqit me 1 orë e gjysmë, Selimit me 1 orë, dhe e Veselit me 45 minuta.
Kronika e gazetares Florijeta Dernjani.
