Mbyllja e institucioneve paralele serbe të mërkurën nga ana e Policisë së Kosovës, sipas Prokurorisë Themelore në Prishtinë, u bë pa autorizimin e saj.
Një situatë e tillë, vlerësohet se shpërfaq mungesën e komunikimit mes këtyre dy institucioneve.
“Konfirmon një problem thelbësor të moskomunikimit në mes dy institucioneve kushtetuese, që është shumë shqetësuese sepse përballë çdo dukurie devijante, përballë çdo pretendimi për vepër penale apo përballë çdo organizimi eventual kundër rendit kushtetues të Republikës së Kosovës, institucionet e vendit duhet të reagojnë si një trup i vetëm dhe vetëm sipas autorizimeve kushtetuese dhe ligjore që janë përcaktuara”, ka thënë Valdet Hoxha, ish- hetues policor.
Përpos mungesës së komunikimit, veprimet e së mërkurës konsiderohen se nuk janë bërë në përputhje të plotë me atë se si përcaktohet në procedurën penale.
“Është praktikë në procedurë penale që Policia çfarëdo hetimi që bën, apo çfarëdo bastisje që realizon, apo çfarëdo aksioni që zhvillon lidhur me çështje të krimit të organizuar ose të krimeve tjera penale, këto do duhej që paraprakisht të mirrej aprovimi apo konsultimi i Prokurorit të Shtetit. Megjithatë, pavarësisht natyrës së veprimeve që janë ndërmarrë, do duhej që Policia e Shtetit fillimisht të merrte një urdhër apo një aprovim nga Prokurori i Shtetit, për bastisjen dhe mbylljen e institucioneve paralele”, ka thënë Vullnet Bugaqku nga KDI
Reagimin e Prokurorisë për mospërshirjen e saj në aksionin për mbylljen e institucioneve paralele, e kritikoi ministrja Haxhiu.
“Ministri Sveçla dhe Policia, u la vet nga prokuroria. Ata thanë që ne s’kemi dorë në mbylljen e këtyre strukturave paralele. Ata prokorurë që nuk guxojnë, le të shkojnë. Sepse vendi i tyre nuk është në prokurori”, tha Haxhiu
E deklarata të tilla, po quhen si ndërhyrje në drejtësi.
“Ndërhyrje në mënyrë flagrante dhe të drejtpërdrejt në pavarësinë e institucionit të Prokurorit të Shtetit. Për shkak se asnjë qytetar, asnjë politikan, asnjë person që mbanë pushtet ekzekutiv, në këtë rast Ministrja e Drejtësisë, nuk i lejohet që të ndërhyjë apo të komentojë”, ka thënë Vullnet Bugaqku nga KDI
Si veprime të pakoordinuara dhe që do duhej të zgjidheshin me dialog, e quajti SHBA-ja, mbylljen e strukturave paralele nga Policia e Kosovës.
