Policia e Kosovës ka njoftuar se sot duke filluar nga ora 11:30 rruga kryesore në Graqanicë do të jetë e bllokuar.
Kjo për shkak të protestës së paralajmëruar nga serbët për kundërshtimin e arrestimit të djeshëm të një serbi nën dyshimin për krime lufte.
“Policia e Kosovës, me qëllim të mbarvajtjes së protestës së paralajmëruar, që do të mbahet sot në Graqanicë, duke filluar nga ora 11:30 e deri në përfundim të protestës, do të ridrejtoj trafikun për automjetet që qarkullojnë nga Prishtina në Gjilan dhe anasjelltas, pasi që rruga kryesore në Graqanicë nuk do të jetë e qarkullueshme për trafik deri në përfundim të protestës”, thuhet në njoftim.
Për këtë Policia ka bërë thirrje që qytetarët të shfrytëzojnë rrugë alternative përgjatë kohës sa do të zgjasë protesta.
“Andaj për të përballuar sa më lehtë rrethanat që do të paraqiten në qarkullimin rrugor, kërkojmë ndihmën dhe mirëkuptimin e të gjithë pjesmarrësve në trafik që përgjatë kohës sa do të zgjatë protesta të shfrytëzojnë rrugët alternative”, thuhet tutje
Ndryshe pas arrestimit të djeshëm të një serbi i cili dyshohet për krime lufte, serbët lokalë u mblodhën para stacionit policor në Graçanicë – komunë e banuar me shumicës serbe që gjendet afër Prishtinës – dhe për një kohë të shkurtër bllokuan rrugën kryesore Prishtinë-Gjilan që kalon nëpër këtë komunë./teve1.info./
Banorët e bllokojnë rrugën pas arrestimit të serbit në Graçanicë, i dyshuar për krime lufte
