I akuzuari i fundit i Speciales, Pjetër Shala, është personi i radhës që do të fillojë të gjykohet për krime lufte e krime kundër njerëzimit.
I njëjti është njoftuar se do të bëjë një deklaratë pa betim, përgjatë gjyqit.
Mbrojtja e tij, ka numëruar disa ankesa kundrejt Zyrës së Prokurorit të Specializuar, për numrin e madh të dokumenteve dhe ndryshimit të numrit të dëshmitarëve.
Ndërkaq, ka bërë një thirrje për trupin gjykues.
“Ne mendojmë nëse ju doni të kuptoni zinxhirin komandues dhe kush e ka pasur këtë në Kukës. Ne duam të shkoni të fabrika e metalit në Kukës. Nëse dëshironi një pasqyrë të qartë të ngjarjeve, do të ishte me vlerë të shihni shtëpinë dhe varrezat në ato pjesë”, tha Jean Louis Gilissen – avokat i Shalës.
Sipas ZPS-së, është normale ndryshimi i dokumenteve dhe dëshmitarëve.
“Çështja e prokurorisë nuk ka ndryshuar, ne kemi vendosur të heqim disa dëshmitarë gjë e cila është tërësisht normale në momentin kur shkon në gjykim në mënyrë të tillë që ta kemi më të përqëndruar çështjen. Dy dokumente kanë të bëjnë me statusin e dëshmitarit në fund të korrikut, prokurori gjithashtu shpjegon që ndoshta nuk synon të përdorë këto dokumente në gjykim megjithatë ka vendosur t’i përfshijë këto dokumente për të qenë sa më përfshirës në dokumentet që i jep mbrojtjes”, tha Filipe Deminiques – Prokuror i Specializuar.
Shala është duke qëndruar në paraburgim që nga prilli i vitit të kaluar.
Kronika e gazetares Florijeta Dernjani.
