Në Dhomat e Specializuara të Kosovës në Hagë po vazhdojnë fjalët përfundimtare në rastin “Thaçi 2”, ku një nga të akuzuarit, Isni Kilaj, po mbrohet ndaj akuzave për vepra penale kundër administrimit të drejtësisë.
Gjatë paraqitjes së fjalës përfundimtare, avokati i Kilajt, Joe Holmes, ka kundërshtuar argumentet e Zyrës së Prokurorit të Specializuar (ZPS) lidhur me pretendimet për pengim të administrimit të drejtësisë.
Holmes ka argumentuar se pretendimi i Prokurorisë për pengim nuk përputhet me elementet e një tentative për kryerjen e veprës penale.
“Ne parashtrojmë që kjo nuk është në përputhje me tentativën dhe ne parashtrojmë se është e pamundur të realizohet pengimi. Domethënë, si mund të pengojë i akuzuari, kur për shembull marrëveshja nuk është që të pengohet”, deklaroi Holmes.
Sipas mbrojtjes, në këtë rast bëhet fjalë për një pengim të supozuar dhe një tentativë të supozuar, ndërsa Prokuroria po kërkon shpalljen fajtor të të akuzuarit për një vepër që, sipas Holmes, nuk është përfunduar.
“Kemi të bëjmë me një pengim të supozuar, një tentativë pengimi të supozuar, ndërkohë që Prokuroria iu kërkon juve, i nderuar zotëri gjykatës, që të merrni vendim fajësie për një vepër të papërfunduar”, tha avokati.
Holmes është ndalur edhe te akuza për komplot, duke theksuar se ajo lidhet me një krim apo akt të synuar. Megjithatë, ai ka kundërshtuar interpretimin që, sipas tij, do të përfshinte të gjitha veprat penale në të njëjtën kategori.
“Sa i takon komplotit, komploti sigurisht që ka të bëjë me një krim apo akt synimi, por edhe në qoftë se komploti mund të realizohej, asnjëherë nuk ka qenë objektivi i ligjvënësit që t’i fuste në një thes të gjitha krimet, siç pretendon avokati i përgjithshëm në këtë rast”, tha Holmes.
Mbrojtja ka insistuar se duhet të bëhet dallim i qartë ndërmjet veprave penale, pasi ato, sipas saj, nuk kanë domosdoshmërisht të njëjtën peshë.
