5 mijë e 480 maturantë nga e gjithë Kosova po i nënshtrohen sot Provimit të Maturës Shtetërore, në kuadër të afatit të dytë. Testimi ka filluar në orën 10:00 dhe po zhvillohet nën mbikëqyrjen e Ministrisë së Arsimit, Shkencës, Teknologjisë dhe Inovacionit (MAShTI).
Testi po mbahet në shkolla anembanë vendit. Në gjimnazin “Sami Frashëri” në Prishtinë, rreth 150 nxënës iu nënshtruan sot këtij afati të dytë.
Drejtori i këtij institucioni arsimor, Betim Sylejmani, tha se gjithçka ka shkuar sipas planit dhe se procesi po zhvillohet në përputhje me rregullat e përcaktuara.
Sylejmani potencoi se në këtë shkollë nxënësit janë të ndarë nëpër 10 salla testuese të ndryshme.
Ai theksoi se po ndërmerren masa të vazhdueshme për të siguruar mbarëvajtjen e procesit dhe për të parandaluar çdo formë të kopjimit.
“Si çdo herë edhe këtë radhë në afatin e dytë po mbahet testi i maturës shtetërore në gjimnazin ‘Sami Frashëri’. Gjithsej janë 10 qendra testimi apo sallë testimi dhe do t’i nënshtrohen 150 nxënës. Të gjitha përgatitjet janë bërë me kohë, administruesit kanë ardhur me kohë dhe përfaqësuesit nga ministria, nga komuna….Masa ndërmerren nga Ministria e Arsimit, vazhdimisht bëhet përpjekje që të pakësohen manipulimet e ndryshme. Ka përmirësime, sepse vetvetiu që nuk ka nxënës të të njëjtës klasë në një sallë testimi, edhe ajo kontribuon në masa të uljes së kopjimit e të tjera”, tha Sylejmani.
Sipas njoftimit të MAShTI-t, hyrja në qendrat e testimit është mbyllur në ora 10:00 të mëngjesit.
Rezultatet e këtij afati do të publikohen më 1 shtator 2025 në platformën elektronike e-Kosova.
