Kanë kaluar mbi dy vjet që nga takimi i fundit në Bruksel mes kryeministrit në detyrë të Kosovës, Albin Kurti, dhe presidentit të Serbisë, Aleksandar Vuçiq.
Edhe pse për një kohë të gjatë nuk janë zhvilluar takime të nivelit të lartë, ndërmjetësuesi i dialogut, Peter Sorensen, po angazhohet aktivisht për të ndihmuar në normalizimin e marrëdhënieve mes Kosovës dhe Serbisë.
Së fundmi, Sorensen ka zhvilluar një takim me ministren e Jashtme të Finlandës, Elina Valtonen, në Helsinki, ku ka bërë të ditur se kanë diskutuar “në detaje” mbi procesin e lehtësuar nga Bashkimi Evropian.
Ndërkohë, profesori i marrëdhënieve ndërkombëtare, Avdi Smajljaj, thotë se gjatë vitit të fundit dialogu nuk ka qenë prioritet as për institucionet e BE-së, e as për Kosovën dhe Serbinë.
“Dialogu nuk ka qenë ndër prioritetet kryesore të BE-së; e njëjta mund të thuhet për Kosovën dhe Serbinë. Serbia është përpjekur në vazhdimësi ta sabotojë marrëveshjen e Ohrit që të mos zbatohet, ndërsa Kosova është përballur me kriza politike, duke mos arritur t’i krijojë institucionet e reja”, deklaroi Smajljaj.
Në anën tjetër, edhe publicisti nga Beogradi, Dushan Janjiq, shprehet skeptik për procesin e dialogut. Ai thotë se burokratët e Brukselit po përpiqen të krijojnë një imazh ndryshe, ndonëse dialogu ka ngecur.
“Për çfarë dialogu po flasim? Mund ta quajmë thjesht një dialog formal mes Kosovës dhe Serbisë, që është shndërruar në një proces menaxhimi konflikti nga Borell dhe Lajçak. E di që burokratët e Brukselit përpiqen të krijojnë përshtypjen se gjithçka është në rregull, por në fakt janë larg normalizimit të marrëdhënieve. Është e domosdoshme një përfshirje më e madhe nga Uashingtoni, që gjërat të lëvizin përpara”, deklaroi Janjiq.
Bashkimi Evropian ka kërkuar nga Kosova dhe Serbia t’i zbatojnë të gjitha marrëveshjet e arritura në Ohër dhe në Bruksel.
Dialogu në nivel të lartë është zhvilluar për herë të fundit në shtator të vitit 2023, ndërsa në nivel teknik, palët janë takuar disa herë.
