Qytetarët e Kosovës po i drejtohen sot kutive të votimit në një proces zgjedhor që përfshin mbi dy milionë votues të regjistruar.
Për mbarëvajtjen e votimit, janë organizuar qindra qendra votimi në të gjitha komunat e vendit, ku qytetarët do të mund të ushtrojnë të drejtën e tyre demokratike.
Krahas vendvotimeve të rregullta, janë paraparë edhe qendra të veçanta për votimin me kusht.
Sipas të dhënave të Komisionit Qendror të Zgjedhjeve, numri i përgjithshëm i votuesve në këto zgjedhje arrin në 2,092,174, duke shënuar rritje krahasuar me procesin e fundit zgjedhor.
Pjesa më e madhe e votuesve janë të regjistruar për të votuar brenda territorit të Kosovës, ndërsa një numër i konsiderueshëm qytetarësh do ta ushtrojnë të drejtën e votës nga jashtë vendit.
Mërgata kosovare ka zgjedhur forma të ndryshme votimi, përfshirë dërgimin e fletëvotimeve me postë dhe votimin fizik në përfaqësitë diplomatike, duke u bërë pjesë e procesit zgjedhor edhe jashtë kufijve të vendit.
Institucionet përgjegjëse kanë bërë të ditur se janë ndërmarrë të gjitha përgatitjet e nevojshme për zhvillimin e rregullt të procesit të votimit në të gjithë vendin.
