Po kryhen edhe detajet e fundit teknike për vendosjen e kamerave që do të regjistrojnë çdo lëvizje në Mitrovicën e Veriut.
Këto mjete që i vendosi Policia e Kosovës në koordinim me Agjencinë për Informim dhe Privatësi do të vëzhgojnë krejt çfarë ndodh në këtë zonë.
Ato tashmë janë të instaluara në hapësirat publike këtu te shkolla teknike dhe stacioni i autobusëve në veri të Mitrovicës, e që sipas burimeve të televizionit, në mbarë veriun do të vendosen 200 sosh.
Udhëheqësi i Divizionit brenda Agjencisë për Informim dhe Privatësi, Kushtrim Mustafa ka siguruar se këto pajisje nuk do të shkelin privatësinë e qytetarëve.
“ Sot gjatë ditës jemi në Mitrovicë të veriut, lidhur me vendosjen e kamerave në hapësirat publike si institucion kompetent për mbikëqyrjen e kamerave që është Policia e Kosovës, në bazë të ligjit për policinë, ne kemi ndërmarrë veprimet dhe kemi udhëzuar policinë e Kosovës se si të vendosen këto kamera, ku të vendosen, mos të shkelët privatësia e qytetarëve në këtë rast, hapësirat privat, por të mbikëqyren sheshet dhe hapësirat publike, rrugët kryesore”, thotë Mustafa.
E krejt kjo, sipas zëvendës drejtorit të Policisë për rajonin e veriut, Veton Elshani, po bëhet për parandalimin e konflikteve të mundshme ndër-etnike dhe hetimin më të lehtë të rasteve.
“Këto kamera janë në bazë të ligjit për privatësi, ne jemi institucioni i cili duhet me i mbikëqyrë këto kamera, dhe i mbikëqyrim vendet publike, kemi pas disa raste të cilat kanë ndodhur ka shumë raste që ndodhin në veri të vendit. Kemi kaluar nga menaxhimi i protestave të dhunshme që kanë qenë më herët, situate është qetësuar tash kemi të bëjmë me hetime kualitative të rasteve, kur të ndodhin rastet duhet të kemi kualitet në hetim”, thotë Elshani.
Sipas burimeve të Tëvë1, ditëve në vijim, kamerat e sigurisë publike do të vendosen edhe në tri komunat tjera, Leposaviq, Zubin Potok dhe Zveçan.
Andaj, gjatë së martës, punimet vazhduan edhe në pjesë të tjera në veriun e vendit.
Gjatë vitit 2023 dhe 2024, në katër komunat veriore, të gjitha kamerat ilegale të vendosura nga grupet serbe, në hapësirat publike, u demoluan nga Policia e Kosovës.
Kjo pasi që janë përdorur për të vëzhguar çdo lëvizje të policisë por edhe zhvillimeve të tjera në veri.
