Të paktën 21 persona kanë humbur jetën në një përplasje trenash në jug të Spanjës, ndërsa dhjetëra të tjerë janë plagosur.
Autoritetet kanë paralajmëruar se numri i viktimave mund të rritet, në atë që po cilësohet si aksidenti më i rëndë hekurudhor në Spanjë në më shumë se një dekadë.
Vagonët e një treni që po udhëtonte drejt Madridit dolën nga shinat dhe kaluan në binarët e kundërt, duke u përplasur me një tren që po vinte përballë, në Adamuz, pranë qytetit të Kordobës.
Sipas rrjetit hekurudhor, rreth 400 pasagjerë dhe anëtarë të stafit ndodheshin në të dy trenat. Të paktën 24 persona janë plagosur rëndë nga përplasja, përfshirë katër fëmijë, sipas shërbimeve të emergjencës së Andaluzisë, shkruan BBC.
Ministri spanjoll i Transportit, Óscar Puente, e përshkroi incidentin si “jashtëzakonisht të çuditshëm”, ndërsa autoritetet nisën një hetim.
“Të gjithë ekspertët hekurudhorë të konsultuar nga qeveria janë jashtëzakonisht të hutuar nga aksidenti,” u tha Puente gazetarëve në Madrid.
Operatori i rrjetit hekurudhor, Adif, tha se përplasja ndodhi rreth dhjetë minuta pasi treni ishte nisur nga Malaga në orën 18:40 sipas kohës lokale (17:40 GMT), në drejtim të Madridit, pasi doli nga shinat në një segment të drejtë të hekurudhës.
Forca e përplasjes i shtyu vagonët e trenit të dytë drejt një argjinature, tha Puente. Ai shtoi se shumica e të vdekurve dhe të plagosurve ndodheshin në vagonët e përparmë të trenit të dytë, i cili udhëtonte nga Madridi drejt Huelvës.
Lloji i trenit të përfshirë në aksident ishte një Freccia 1000, i cili mund të arrijë shpejtësi maksimale deri në 400 km/orë, tha një zëdhënës i kompanisë hekurudhore italiane Ferrovie dello Stato për agjencinë Reuters.
Ekipet e shpëtimit thanë se rrënojat e shtrembëruara të trenave e bënin të vështirë nxjerrjen e personave të bllokuar brenda vagonëve.
Shefi i zjarrfikësve të Kordobës, Francisco Carmona, i tha televizionit publik spanjoll RTVE:
“Madje na është dashur të heqim një person të vdekur për të arritur te dikush i gjallë. Është punë e vështirë dhe delikate.”
Salvador Jimenez, gazetar i RTVE-së që ndodhej në njërin prej trenave, tha se përplasja u ndje si një “tërmet”.
“Isha në vagonin e parë. Kishte një moment kur u ndje si tërmet dhe treni kishte dalë vërtet nga shinat,” tha Jimenez.
Pamjet nga vendngjarja duket se tregojnë disa vagona treni të përmbysur anash. Punonjësit e shpëtimit shihen duke u ngjitur mbi tren për të nxjerrë njerëzit nga dyert dhe dritaret e anuar të vagonëve.
Një pasagjer që udhëtonte drejt Madridit, José, i tha televizionit publik Canal Sur:
“Kishte njerëz që bërtisnin dhe thërrisnin për mjekë.”
