Prokuroria Themelore në Prishtinë ka kërkuar caktimin e masës së paraburgimit ndaj dy personave të dyshuar për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, e paraparë me Kodin Penal të Republikës së Kosovës.
Sipas njoftimit të Prokurorisë, ngjarja ka ndodhur më 21 tetor 2025, rreth orës 23:40, në rrugën “Malush Kosova” në Prishtinë, ku njësitet e Policisë së Kosovës kanë ndaluar një veturë të tipit Volkswagen Passat, të cilën po e drejtonte i dyshuari F.G., ndërsa pasagjer ishte i dyshuari B.M.
“Gjatë kontrollit të kryer nga Policia e Kosovës, në veturë janë gjetur dy (2) paketime me mbishkrimin ‘777’, njëra me peshë 1,143.9 gramë, ndërsa tjetra me peshë 1,135.7 gramë, që përmbanin substancë narkotike të llojit kokainë”, thuhet në njoftimin zyrtar të Prokurorisë.
Po ashtu, gjatë kontrollit të çantës së të dyshuarit B.M., policia ka gjetur 12,050 euro para të gatshme, si dhe një telefon të markës iPhone 15 Pro Max. Ndërkohë, tek i dyshuari F.G. janë gjetur 1,050 euro dhe një telefon i markës Samsung.
“Të gjitha këto sende janë sekuestruar nga Policia e Kosovës, si prova materiale në procedurën penale”, thuhet më tej në komunikatë.
Prokurori i Shtetit ka bërë të ditur se, gjatë seancës së procedurës paraprake, do të kërkojë nga gjyqtari i procedurës paraprake që ndaj të dyshuarve të caktohet masa e paraburgimit, për shkak të dyshimit të bazuar dhe rrezikut të ikjes apo ndikimit në hetime.
