Rreth 19,514 maturantë do t’i nënshtrohen sot Testit të Maturës Shtetërore 2026 në afatin e parë, i cili do të zhvillohet në 152 qendra testimi në mbarë vendin.
Sipas Ministrisë së Arsimit, Shkencës, Teknologjisë dhe Inovacionit, procesi do të administrohet nga 1,360 administrues dhe 750 kryetarë e anëtarë të komisioneve.
Testi nis në orën 10:00 dhe përfundon në orën 12:30, ndërsa maturantët janë të obliguar të paraqiten në qendrat e testimit më së largu deri në orën 09:00, për të përfunduar procedurat e identifikimit dhe sistemimit në sallat përkatëse.
Testi i Maturës Shtetërore 2026 do të organizohet brenda një dite dhe do të përfshijë katër lëndë: gjuhën amtare, gjuhën angleze, matematikën dhe një lëndë zgjedhore të përzgjedhur nga kandidati. Në total, testi përmban 100 pyetje, nga 25 për secilën lëndë.
Ministria ka rikujtuar se posedimi i telefonave mobilë dhe i çdo pajisjeje tjetër elektronike gjatë testimit është rreptësisht i ndaluar. Çdo kandidat që konstatohet me telefon apo pajisje elektronike do të largohet menjëherë nga testi, pavarësisht nëse pajisja është përdorur apo jo.
MAShT ka bërë të ditur se Qendra për Vlerësim ka përfunduar të gjitha përgatitjet e nevojshme për mbarëvajtjen e procesit, ndërsa administruesit dhe komisionet janë trajnuar dhe pajisur me udhëzimet përkatëse./teve1.info/
