Gati gjysma e popullsisë së Gazës janë fëmijë, dhe çdo 45 minuta vritet njëri nga ta.
Mesatarisht, 30 fëmijë vriten në Gaza për çdo ditë që nga fillimi i luftës në Gaza, ku në total janë vrarë së paku 17,400 fëmijë. Shumë të tjerë kanë mbetur nën rrënoja ku presupozohet se kanë vdekur, ka raportuar Al Jazeera.
Se paku 825 foshnja ende pa i mbushur një vit kanë vdekur nga sulmet izraelite, kurse grupmosha me viktimat më të shumta është ajo prej 6-10 vjeç, ku numërohen së paku 4,032 të vrarë, sipas shifrave të publikuara nga Ministria e Shëndetësisë.
Shumica e fëmijëve të mbijetuar përballen me trauma nga luftërat e shumta ndaj të cilave janë ekspozuar gjatë gjithë jetës së tyre, duke jetuar nën opresionin izraelit.
Deri në 17,500 të rritur dhe fëmijë pësuan lëndime të rënda të gjymtyrëve, duke i lënë ata në nevojë për rehabilitim dhe ndihmë, vlerësoi Organizata Botërore e Shëndetësisë në shtator.
Organizata e OKB-së për ndihmë humanitare OCHA e quajti atë “kohortën më të madhe të fëmijëve të amputuar në historinë moderne”.
Ofensiva e Izraelit ka vrarë më shumë se 50,000 palestinezë të të gjitha moshave dhe ka plagosur më shumë se 113,000, sipas Ministrisë së Shëndetësisë.
