Mbi 11 mijë biznese të reja kanë filluar punën përgjatë vitit 2022.
E përkundër kësaj, rreth 100 të tjera janë mbyllur.
Oda e Afarizmit të Kosovës thekson se ka edhe biznese të mbyllura që nuk janë deklaruar si të tilla.
Përderisa rendit faktorët që kanë ndikuar deri te këto statistika.
“Numri zyrtar i bizneseve që janë hapur gjatë vitit 2022 janë 11 mijë e 269 sosh, ndërsa numri i bizneseve që janë mbyllur gjatë vitit 2022, deri tani, janë gjithsej 96 sosh. Mirëpo, për shkak të procedurave jashtëzakonisht të ndërlikuara dhe të tej zgjatura për shuarjen e biznesit ka shumë prej këtyre të fundit të cilat janë mbyllur por zyrtarisht nuk janë të deklaruara si të tilla. Arsyet e mbylljes së bizneseve janë nga më të ndryshmet në mesin e të cilave pa dyshim përfshihen ballafaqimi me pandeminë Covid-19, lufta në Ukrainë, ngritja enorme e çmimeve të pothuajse secilit produkt etj”, thuhet nga Oda e Afarizmit të Kosovës.
Ndërsa njohësi i çështjeve ekonomike, Besnik Avdija vlerëson se shuarja e bizneseve, ndikon në uljen e zhvillimit ekonomik.
Sipas tij, deri te kjo situatë shpie mos-analizimi i mjaftueshëm i tregut.
“Çdo shuarje e biznesit është një vlerë më pak në treg. Ndër faktorët potencial që ndikojnë, në bazë të shumë studimeve janë papërshtatshmëria e produktit, shërbimit, biznesit me tregun. Pra në treg nuk gjen hapësirë për të kriju shitje, për të gjeneruar të hyra”, ka thënë Avdija.
Në vitin 2021, sipas të dhënave të Agjencisë së Statistikave të Kosovës u regjistruan rreth 10 mijë biznese ndërsa u shuan mbi 1 mijë e 500 të tjera.
Kronika e realizuar nga Valëza Sylejmani
