Pavarësisht se kohëve të fundit, mbulueshmëria e nevojave ka pësuar ndryshime, nevoja për sigurimin e objekteve ka mbetur e njëjtë.
Rrjedhimisht, KEK-u ka nënshkruar kontratë në vlerë 1 milion e 340 mijë euro për ruajtjen dhe sigurimin e objekteve të saj.
“Puna në prodhim të qymyrit dhe energjisë elektrike në mihjet dhe termocentralet e KEK-ut është e organizuar në tri ndërrime pa ndërprerje. Në anën tjetër, hapësira për të cilën kërkohet të kryhen shërbimet e sigurimit fizik ka një sipërfaqe prej rreth 45 km2, dhe është në pjesën më të madhe e paasfaltuar dhe pa rrethuar. Përndryshe, asetet dhe pasuria e cila duhet të ruhet ka një vlerë kritike nacionale, me anë të së cilave prodhohet mbi 8 milion ton qymyr në vit dhe mbi 5.5 milion MËh energji elektrike në vit, që paraqet rreth 90 % të konsumit vendor të energjisë elektrike”, thuhet në kontratën e nënshkruar.
Kohëzgjatja e kontratës është 6 mujore, derisa është theksuar se asnjë mungesë e sigurimit nuk mund të lejohet.
Megjithatë, jo të gjitha pjesët e KEK-ut, kanë sigurim 24 orësh.
“Tërësia e këtyre aseteve kritike që shtrihen në një hapësirë të gjerë në disa komuna (Obiliq, Fushë Kosovë, Prishtinë, Podujevë) duhet ruajtur përmes një kompanie e cila duhet të jetë e specializuar dhe licencuar sipas ligjit, me ç’rast janë të angazhuar mbi 360 punëtorë të licencuar të sigurimit të organizuar në tri ndërrime gjatë 24 orëve, 7 ditë në javë pandërprerë si dhe shërbimi sistemit elektronik të vëzhgimit”, thuhet tutje në kontratë.
Varësisht rëndësisë së pjesëve të objektit është parashikuar edhe koha e qëndrimit të sigurimit, qoftë fizik apo elektronik.
Kronika e realizuar nga Florjeta Dërnjani.
