Mbi 1.8 milionë pelegrinë nga e gjithë bota u mblodhën të shtunën në malin Arafat në rajonin perëndimor të Arabisë Saudite për të kryer Haxhin vjetor, njoftoi Ministria saudite e Haxhit dhe Umres.
Gjatë një konference për shtyp, ministri i Haxhit dhe Umres, Tawfiq Al-Rabiah tha se pelegrinët filluan të mblidheshin në Arafat, një rit vendimtar i pelegrinazhit të Haxhit, i cili zgjat gjashtë ditë.
Ministri më tej bëri të ditur se numri i përgjithshëm i pelegrinëve për këtë vit (1445 hixhri) arriti në mbi 1.8 milionë, përfshirë 221.854 nga brenda Mbretërisë. Pelegrinët mbërritën në Arabinë Saudite nga mbi 200 vende, shtoi ministri.
Në statistikat përkatëse, Autoriteti i Përgjithshëm Saudit për Statistikat tha se numri i pelegrinëve meshkuj ishte 958.137, ndërsa pelegrinët femra gjithsej 875.027.
Vendet arabe përbënin 22.3% të pelegrinëve, vendet jo arabe aziatike 63.3%, vendet jo arabe afrikane 11.3%, dhe pelegrinët nga Evropa, Amerika, Australia dhe vende të tjera 3.2% të totalit.
Sipas të njëjtit burim, sa i përket rrugëve të mbërritjes së pelegrinëve nga jashtë Mbretërisë, 1.546.345 kanë mbërritur përmes ajrit, 60.253 përmes tokës dhe 4.714 përmes detit. /AA
