Sezoni i verës ka bërë që të rritet edhe fluksi i qytetarëve që hyjnë në Shqipëri përmes pikës kufitare të Morinës, pasi mijëra qytetarë nga Kosova kanë vendosur që pushimet t’i kalojnë në Shqipëri.
Për të përballuar lëvizjen, autoritetet kufitare po operojnë me 12 sportele dhe po zbatojnë marrëveshjen e lëvizjes së lirë mes Shqipërisë dhe Kosovës, duke shmangur pritjet në kufi.
Vetëm gjatë 12 orëve të fundit, në Morinë janë përpunuar të dhënat e mbi 21 mijë qytetarëve dhe të më shumë se 6 mijë automjeteve.
Sipas të dhënave kufitare, mbi 12 mijë persona kanë hyrë në territorin shqiptar, ndërsa pjesa tjetër kanë dalë nga vendi.
Ndërkohë, muaji korrik po mbyllet me mbi 1 milion e 362 mijë lëvizje qytetarësh në Pikën Kufitare të Morinës, një tregues i fluksit të lartë që ka shoqëruar sezonin turistik veror. /OraNews
