Burra të shumtë të Drenicës e më gjerë ishin mbledhur në këtë depo.
Kjo me qëllimin e vetëm, që t’i varrosnin trupat e familjes Jashari.
Në këtë lokacion, në marsin e vitit 1998, ishin ruajtur kufomat e kësaj familje dhe dëshmorëve tjerë.
Por 28 vite pas, gjithçka ka ndryshuar këtu.
Pronari i kësaj depoje nuk ishte i qasshëm për televizionin.
Mirëpo deri më pak se dy vite, në këtë lokacion nuk ishte bërë asnjë ndryshim nga ta.
Madje këtu nuk gjendet as ndonjë pllakë përkujtimore, në të cilën do të kujtohet rëndësia e këtij vendi.
E për tëvë1, nga Komuna e Skenderajt, kanë treguar arsyet se pse nuk është investuar në këtë hapësirë.
“Duhet theksuar se objekti në fjalë ka qenë dhe mbetet pronë private dhe nuk ka qenë në menaxhim apo administrim të komunës. Për këtë arsye, komuna nuk ka pasur mundësi institucionale për të ndërmarrë veprime në atë hapësirë. Po ashtu, e njëjta vlen edhe për çështjen e investimeve. Duke qenë se bëhet fjalë për pronë private, komuna nuk mund të ndërhyjë apo të investojë në një pronë që nuk është në pronësi publike. Pronari i pronës, në kuadër të të drejtave të tij të pronësisë, ka vendosur që objektin ta shndërrojë në lokal afarist”, tha Besjana Thaçi nga Komuna e Skenderajt.
Por si kishte shkuar e gjithë ceremonia e varrimit asokohe?
“Më 9 mars e kanë thirr një grup, nuk kanë pas mundësi me organizu varrimin se nuk ka pasur njerëz, me datën 10 mars unë jam dal jam takuar me Hilmi Nuredinin dhe Ilmi Jasharin, pasi ju kanë thënë familjarëve merrni ose po dëshirojmë me i varros, ishin ardh me ekskavator, ishin ardh me kamion”, tha dëshmitari Xhafer Murtezaj.
Duke qenë se ekzistonte rreziku që kufomat të varrosën në një varrezë masive nga forcat serbe, Murtezaj organizoi varrimin e trupave të dëshmorëve.
“I kam thënë Ilmisë, hyp kerr shko në fshat atje kanë kacia, kanë lopata unë kam hy në lagjen Murtezaj i kam gjetë një 35 persona dhe i kemi qel varret. Atë ditë me 10 nuk kemi dasht vetëm me varros. Me vonë ata kanë dashtë me varros në një vend krejt”.
Trupat e familjes Jashari dhe dëshmorëve të tjerë pushojnë në varrezat e kompleksit memorial “Adem Jashari” në Prekaz.
