Çdo punëtor që mund të humb vendin e tij të punës nuk do të mbesë pa para.
Kjo meqenëse kjo do të kompensohet nga Fondi i Sigurimeve Shoqërore.
Kështu ka premtuar kryeministri, Albin Kurti, gjatë prezantimit të planit qeverisë.
“Fondi i Sigurimeve Shoqërore, për ta mbështetur punëtorin pas humbjes së vendit të punës, si dhe për mbulimin e pushimit të lehonisë dhe pushimit prindëror”, tha Kurti.
Por formimi i këtij Fondi është një nga kërkesat e kamotshme të Sindikatës së Sektorit Privat.
“Ne ka me dekada që kërkojmë që në Kosovë të jetë një fond i sigurimeve sociale. Në rënd të parë një fond do t kishte mjete për puntorët të cilët humbin jetën në vendet e tyre të punës e që nuk është numër i vogël.Realisht ky fond është shumë i nevojshëm , i mjaftueshëm në cdo protestë që e kemi bërë dhe grevë e kemi kërkuar”, deklaroi Jusuf Azemi nga sindikata e sektorit privat.
Por nga kjo Sindikatë nuk e shohin shumë të realizueshme formimin e Fondit për Sigurime Shoqërore.
“Unë fare nuk besoj që do ta bëjë këtë, kjo është sa për të dalë me një program qeverisës, sepse kemi kërkuar më disa herë më kërkesa të protokolluara që të ndodhë ky fond dhe ky nuk po ndodhë”, theksoi Azemi.
Skeptikë në formimin e këtij Fondi është edhe profesori i ekonomisë, Fidan Qerimi.
“Unë uroj që të bëhet ky fond, ne e kemi nje fond që është krijuar për sigurime shëndetësore e që nuk po implemetohet gati që një dekadë. Uroj që ky fond të bëhet dhe të dilet në ndihmë personave që mbesin pa punë. Më tepër do të duhej që ne si ekonomi të orientohemi ka zhvillimi ka potenciali jonë ekonomik e të shohim një model ekonomik me te cilin ne do ta zhvillonim vendin”, vlerësoi Qerimi.
Kurti poashtu ka premtuar edhe pagë të 14-të për punëtorwt e sektorit publik e atë të 13 për puntorët e sektorit privat.
