Në selinë e Federatës së Futbollit të Kosovës (FFK), të mërkurën është mbajtur takimi për të koordinuar planin pesëvjeçar të infrastrukturës së futbollit në Kosovë. Grupi Koordinues, i cili është krijuar nga MKRS-ja, si dhe përfaqësues të FFK-së dhe të nivelit profesional, ka mbajtur takimin e radhës, e ku ishin të pranishëm edhe ministri Hajrulla Çeku dhe kreu i FFK-së, Agim Ademi.
Qëllimi kryesor i këtij takimi ishte fillimi i punës intensive në krijimin e standardeve për të gjitha stadiumet në Kosovë dhe nisja sa më e shpejtë e zbatimit të planit pesëvjeçar të infrastrukturës së futbollit, që është prezantuar nga ministri Çeku dhe presidenti Ademi edhe në takimet me presidentin e FIFA-s, Gianni Infantino dhe atë të UEFA-s, Aleksandër Çeferin vitin e kaluar.
Ministri Çeku u shpreh se plani përfshin Memorandumet e Bashkëpunimit të arritura me 16 komunat e Kosovës bashkë me FFK-në për përmirësimin e infrastrukturës së futbollit. Ministri gjithashtu u angazhua për mobilizimin e të gjitha resurseve financiare për të krijuar një infrastrukturë sportive sa më të mirë.
E kreu i FFK-së, Ademi premtoi mbështetjen e plotë të Federatës për Grupin Koordinues dhe për të gjitha iniciativat për avancimin e futbollit në Kosovë. Ai e vlerësoi këtë takim si hap pozitiv drejt përmirësimit të infrastrukturës së futbollit në Kosovë dhe si një shembull të bashkëpunimit të suksesshëm mes autoriteteve qendrore, lokale dhe sportive.
Ministri dhe presidenti i FFK-së shfaqën gatishmërinë për bashkëpunim të vazhdueshëm, derisa theksuan nevojën për menaxhim më të mirë të objekteve sportive. Grupi Koordinues përbëhet nga Florim Kryeziu, kryesues (MKRS) dhe anëtarët: Drilon Kabashi (MKRS), Muhamet Koca (FFK), Florim Grajçevci (FFK), Gent Gërdovci (FFK), si dhe dy përfaqësues me rotacion nga kolegjiumi për Kulturë, Rini dhe Sport i Asociacionit të Komunave të Kosovës.
