Në ditë vikendi u ulën në banka shkollore.
Por jo për të zhvilluar orë mësimore.
Kësaj radhe nxënësit iu nënshtruan “Garave të Diturisë Prishtina 2024”, që po mbahen në Gjimnazin e Specializuar Matematikor në Prishtinë.
Përgatitjet për këtë ditë kanë filluar që nga dita e premte.
“Ne objektin e kemi përgatitur qysh nga dita e djeshme, ku secili nxënës e ka vendin e caktuar edhe lëndën e caktuar me koordinatorët përkatës nga Drejtoria e Arsimit si dhe tash edhe siç e pat edhe shkojë çdo gjë në rregull edhe gjatë hyrjes dhe pjesëmarrjes të fëmijëve në këtë garë”, ka thënë drejtoresha e gjimnazit të specializuar matematikor, Fahrije Retkoceri.
I gjithë organizimi është bërë nga Drejtoria e Arsimit.
Drejtoresha Jehona Lushaku Sadriu tha se për nxënësit që do të zgjidhen si më të mirët, do të ketë shpërblime.
“Si çdo vit Drejtoria e Arsimit organizon gara komunale në të cilat marrin pjesë të gjitha shkollat e Prishtinës. Garat organizohen për lëndë dmth secila shkollë zgjedh nxënësit më të mirë të lëndëve dhe pastaj vinë në bazë të niveleve, hynë në garat përkatëse do të zgjidhen normalisht më të mirët e të gjitha shkollave ku do të ndahen edhe disa shpërblime simbolike”, tha ajo.
Por se si ka ardhur deri tek përzgjedhja e nxënësve, tregoi profesori i gjuhës shqipe, Fatmir Fejziu.
“Fillimisht ne kemi bërë një organizim të brendshëm në shkollë, janë mbajtur garat e brendshme nëpër klasa, pra klasat e 9-ta dhe është bërë një vlerësim i brendshëm përmes testeve, janë zgjedhur nxënësit më të mirë për secilën lëndë dhe natyrisht tani kemi sjellë nxënësit më të mirë për çdo lëndë të caktuar”, tha ai.
Në këto gara kanë marrë pjesë mbi 40 shkolla të Komunës së Prishtinës ku janë të përfshirë mbi 300 nxënës. Të hënën pritet të bëhen publike rezultatet.
