Viteve të fundit disa punëtorë në Kosovë kanë humbur jetën në vendet e tyre të punës. Një punëtor ka humbur jetën ditën e hënë në Prishtinë, punëtori ka rënë nga një lartësi, derisa ishte duke punuar.
Drejtori i Byrosë Kosovare të Sigurimit (BKS), Sami Mazreku, tha se mungesa e sigurimeve të detyrueshme në vendet e punës në Kosovë është një problem që mund të zgjidhet shumë lehtë, por duhet vendosmëri nga ana e institucioneve të Kosovës.
Mazreku tha se sigurimi i punëtorëve duhet të obligohet me ligj dhe akte tjera.
Ai në një intervistë në emisionin e mëngjesit në RTK, bëri me dije se më parë ka dorëzuar letra tek kryetarët e komunave të Kosovës, që në kuadër të lejës ndërtimore që e lëshojnë për kompanitë e ndërtimit, ato të obligohen edhe të blejnë një policë të sigurimit për punëtorë, që do të ishte një garancion për sigurinë e punëtorëve.
Drejtori Mazreku bëri me dije se është i gatshëm të diskutojë për akterët institucional që të gjejë zgjidhje për punëtorët në sektorin e ndërtimtarisë që ata të jenë të siguruar.
