Prokuroria Speciale e Republikës së Kosovës ka njoftuar se ka dorëzuar në Gjykatën Themelore në Prishtinë një aktakuzë ndaj tre personave, të dyshuar për disa vepra penale, përfshirë “Mashtrimi”, “Detyrimi”, “Lajmërimi apo kallëzimi i rremë” dhe “Mbajtja në pronësi, kontroll ose posedim të paautorizuar të armëve”.
Sipas aktakuzës, i pandehuri K.K. ngarkohet me veprën penale të mbetur në tentativë “Detyrimi”, si dhe me “Mashtrim” dhe “Mbajtje të paautorizuar të armëve”. Prokuroria pretendon se gjatë viteve 2023–2024, ai ka përfituar në mënyrë të kundërligjshme 485 mijë euro, duke e mashtruar të dëmtuarin E.N. përmes një marrëveshjeje joformale për shitjen e disa banesave, të cilat më pas nuk i kishte shitur ashtu siç ishte marrë vesh.
Ndërkaq, i pandehuri A.M. akuzohet për armëmbajtje pa leje dhe për lajmërim apo kallëzim të rremë, të cilin dyshohet se e ka bërë ndaj të dëmtuarit E.N.
Po ashtu, i pandehuri D.M. sipas aktakuzës dyshohet se ka kanosur të dëmtuarin me qëllim që të përfitojë kundërligjshëm pasuri dhe ta detyrojë atë të veprojë në dëm të pasurisë së tij./teve1.info/
