Ministria e Arsimit, Shkencës, Teknologjisë dhe Inovacionit (MAShTI), ka bërë të ditur se do të shqyrtojë vendimmarrjen e Këshillit Drejtues të Institutit Albanologjik.
Në një komunikatë për media MASHTI ka bërë të ditur se ka marrë ankesa lidhur me mbajtjen e mbledhjes së Këshillit Drejtues të Institutit Albanologjik, ku është vendosur për ushtruesin e detyrës së drejtorit të institutit e që është emëruar Meliza Krasniqi.
MASHTI ka thënë se nuk ka qenë i njoftuar paraprakisht për këtë mbledhje e cila është mbajtur më 20 qershor e njoftimin për mbledhjen e mbajtur e kanë marrë më 23 qershor.
Ankesa ka pasur edhe nga dy anëtarë të Këshillit Drejtues.
“Në këtë mbledhje, përveç pikave të tjera, është vendosur për caktimin e u.d. drejtorit të Institutit Albanologjik – Prishtinë. Gjithashtu, MAShTI ka pranuar njoftimin zyrtar dhe shqetësimin e dy anëtarëve të Këshillit Drejtues të Institutit Albanologjik. Ata kanë njoftuar zyrtarisht Ministrinë se, në mungesë të materialit paraprak për shqyrtim, kanë kërkuar shtyerjen e kësaj mbledhjeje. Përkundër kësaj kërkese, ata janë të informuar se mbledhja është mbajtur, dhe sipas njoftimit, nuk ka pasur kuorum për vazhdimin e saj dhe për marrjen e vendimeve të ligjshme nga Këshilli Drejtues. Ministria e Arsimit, Shkencës, Teknologjisë dhe Inovacionit, pas pranimit të të gjitha informatave dhe dokumenteve zyrtare lidhur me këtë proces, do të shqyrtojë këtë vendimmarrje në pajtim me kompetencat dhe mandatin ligjor, dhe për këtë do të njoftojë institucionet dhe zyrtarët përgjegjës”, thuhet në komunikatë.
